U Bajop Pyngrope ula long uba kreh ban iasoh bad ka AITC

Syllad | The Rising MeghalayaDecember 6, 2021

U MDC ka seng Congress napoh ka Rambrai Jyrngam Constituency, u Bajop Pyngrope u la pynpaw ia ki dak ki shin ba imat u la khreh ba un mih noh na ka seng Congress da kaba u lah ban leit ban pyniasnoh pat ialade sha ka seng All India Trinamool Congress (AITC).

Ki dak ki shin jong u bah Bajop ba u lah ban khreh mih noh na ka paty congress ka dei hadien ba u la leit ba un iadon bynta ha ka jingialang rung dkhot jong ki paidbah ka Nongthymmai Constituency, ha ka jingialang kaba la long hynne ka lah sngi U Blei.

Haba iakren bad kane ka lad pathai khubor, na ka liang u bah Bajop, u pynpaw ba u don ia ka jingthmu ne long ruh uba la pynkhreh ba un iakhun ia ka MLA elekshon ka jylla kaban long ha u snem 2023, tangba na ka constituency kaba kumno un iakhun, ia kane u bah Bajop u la ong ba um pat shym la jied satia. Tangba u bah Bajop u la ong ba nyngkong un sdang ba un iaid shwa sha ki paidbah shwa ba un shim ia ka rai, bad dei lyngba ka rai u paidbah kaba un burom, hooid wat lada u don ia ka jingthmu ba un iakhun, hynrei lada u paidbah u rai ba ka por kam pat dei satia ia u ba un ialeh, u bah Bajop u sngew ban ong ba un nym sngew eiei ba un shong shwa ruh, bad ba un trei shwa na ka bynta ka party.

Haba phai pat sha ka TMC u bah Bajop Pyngrope, u ong ba ha ka jingshem bad iohi ka jong u, ka seng All India Trinamool Congress ne ba tip lyngkot ia ka da ka TMC hapoh ka jingialam ka Mamata Banerjee, myntri rangbah ka jylla West Bengal, kan kylla long ka seng sain pyrthei ne ka party kaban lam khmat bhai a ka thain lam mihngi jong ka ri India ne pher wiak, ka lah ruh ba kan ialam ia ka kynhun liang ne katta ka United Opposition da ka jinglong myntri Rangbah duh jong ka mamta Baneerjee.

Shuh shuh u bah Bajop, u ong ba ha ka jingkhmih ka jong u, ka rekod jong ka TMC ka long ba ha ka jingsynshar ka jong ka, ym pat juh shem ne iohi koit ba kan don katta ka jingiaumsnam na ka jingiasngew pher niam ne jaidbynriew, ym don ka jingiuhroit ne ban bein ne lehbien ia kano kano ka niam, kynhun ne ia ki rit paid.

Ka TMC ka dei ka seng sain pyrthei kaba iar ne ka secular party bad ki scheme kiba ka la pyntreikam hapoh la ka jylla lajong, katta ka West Bengal, ki long kiba da bna nam, tad haduh ba na ka liang ka seng BJP, ka la trei borbah ba kan pynrem ia ka TMC ha ka elelshon sha ka iing dorbar thawain ha West Bengal, hynrei kam shym la lah satia.

Dei lyngba ka jinglah ban thaw ne pynmih ia ki scheme pynroi, ba ka pynlong ia u bah Bajop ba u nam un jer un thoh ia ka mamta Banerjee kum ka ‘Iron Lady’ jong ka ri India, namar ka la lah shisha ba kan ieng khlem khih kampher wat hadien ba ka sorkar BJP ka la nion borbah bha ia ka da kaba pyndonkam naduh ki enforcement directorate, intelligence bureau, para military, hynrei ha kabakut ka BJP ka khlem lah sati aba kan pynrem ia ka Mamta Baneerjee.

Ha kaba kut u bah Bajop u sngew ban ong ba lada ki paidbah ki dei kiba stad, ka TMC mynta kan dei ka party kaban ialam kaban sngap ka eh ka shon ka jong u duk u suk u rangli u juki.