U Chanki Langbang u Dolloi ba pura ka Elaka Shangpung

Syllad | The Rising MeghalayaMarch 25, 2022

U Chanki Langbang ula shah jied kum u Dolloi ba pura jong ka Elaka Shangpung hadien ba ula ioh vote tam haduh 2786 pyrshah ia u kyrtong uba wan ba ar haka jingniew vote kaba long ha MDC Hostel, Iawmusiang Jowai haka sngi Thohdieng.

U Joint Secretary & Returning Officer Dolloiship Election, Jaintia Hills Autonomous District Council (JHADC) u Ma Hatmin Lyngdoh Giri hadien ka jingñiew vote ula pynbna ba u Chanki Langbang ula shah jied kum u Dolloi ka Elaka Shangpung.

U Chanki Langbang uba la ïeng haka muhor jong u ‘Sngi’ ula ïoh khur kumba 5560 vote, u Daeiladmi Sungoh uba ïeng haka muhor jong ka ‘Jingkieng’ ula ïoh 2720 votevote katba u Harising Papang uba ïeng haka muhor jong ka ‘Khlur’ ula ïoh tang 194 vote bad 220 vote pat kidei ki vote kiba shah kyntait (Invalid vote).

Haba ïakren bad ki lad pathai khubor u Chanki Langbang ula ai khublei ïa baroh ki khun ka elaka kiba kyrshan ïa u naduh ka 4 tarik December 2016 ba ula shah thung kum u Acting Dolloi haduh kane ka sngi ka jinglong Dolloi ba pura jong ka Elaka.

Ka jingthrang jingangnud jong ka long ban trei ïaki khun ka Elaka da ka jingïeid bad ngan shakri ruh da ka jingïeid khnang ban skhem ka khyndew ka shyiap jong ka Elaka.

Ula kular ban shimkhia ïaka eh ka shon bad ban ym ñiew ne leh shilliang khmat ïano ïano nalorkata ula kular ruh ban trei naka bynta ka bha ka miat jong ki paid ka elaka baroh kawei.