U CM ka Assam u la don jingktah khlieh; ong u MP ka Congress na Tura

Syllad | The Rising MeghalayaJune 11, 2024

U MP bathymmai ka Congress na Tura, u Saleng A Sangma u la kynnoh ba u Myntri Rangbah ka Assam u Himanta Biswa Sarma u la don ka jingshitom kaba ktah ia ka bor pyrkhat pyrdain da kaba kynnoh ia ka niam ne balang kum ka daw halor ka jingshah rem noh ki paralok synrop NDA ba la ialam da ka BJP ha kane ka Lok Sabha ilekshon kaba dang shu dep.

Haba kren sha ki lad pathai khubor haka 10 tarik Jylliew, u Saleng u la ong, “U CM ka Assam da lade hi u la kren shaphang ka niam ha ka por ialap ilekshon.

“Phi la iohi kumno ba u CM ka Assam u la leh ha kaba iadei bad baroh kito ki kynhun synrop niam, kumta balei ban kren than halor kane namar la iohi ba u la don ruh malu mala ka jingktah khlieh,” ong u Saleng.

U MP ka Tura u la ong ruh ba u Sarma ia lade hi u la kren shaphang ka niam ha ka por ba ula leit ban ialap ilekshon, bad hashwa kane u la leh ruh ia ki kam thombor pyrshah ia ki nongshong shnong kiba dei ki Muslim.

Nalor kata u la ong ruh, “Phi la iohi hi pyllein pyllein, kumta balei u Himanta un kynnoh mynta ia ka niam. Ha ka jingshisha um dei ban kynnoh ia ka niam, dei na kata ka daw nga ong ha phi ba mynta lehse u la ktah khlieh.”

“Ia lade hi u la iai bteng ia kajuh ka sienjam ia kaba u la kren pyrshah kham hashwa. Phi la dep lypa ban iohi ia kata. U la ong ba um donkam ia kane ia katai, u la kren pyllein pyllein pyrshah ia ka jingtreikam jong kawei ka kynhun niam. Mynta kumno un lah ban kren ba u tip ia ka Meghalaya lane ka Manipur, Nagaland kiba la pyndonkam ia kum kine ki sienjam,” u la bynrap.