U CM u dei ban tuklar iaka kam bret ñiut ha Jowai: OR Shallam

Syllad | The Rising MeghalayaDecember 28, 2021

U Ma OR Shallam ula ong ba u Myntri Rangbah ka Jylla Conrad K Sangma u dei ban tuklar iaka kam bret ñiut ka Jowai hadien bala phiel ka Jowai Municipal Board (JMB) ban pyllang pynlum ia ki ñiut kiba la lum thup ha Iawmusiang, Jowai.

U Ma Shallam ula ong ki myntri sorkar kumjuh u MLA ka Jowai kim dei ban ai khubor lamler halor ka kam bret ñiut ha Jowai tad haduh bym lah ban pynioh iaka jaka kaba thikna ban bret ñiut.

“Ka kamram u CM ban tuklar ia kane ka kam namar ha u juh u snem ki nong Jowai ki kynduh mawsiang ha kaba iadei ban kam bret ñiut naduh ka por Behdieñkhlam bad Christmas bad mynta sa ka New Year ruh ki iew ki hat bad ki ïing briew kila dap da ki ñiut,” la ong u ma Shallam.

Ka jingsangeh lum ñiut ka JMB kala palat shitaiew mynta hadien ba ki nongshong shnong hapoh ka lama jong ka he Elaka Nartiang Coordinate Committee (ENCC) kila pyrshah iaka jingbret ñiut ha Mooshutsdai Mookabeng hajan ka shnong Sohphoh.

Kane ka jingpyrshah jong ka ENCC kala pynlong iaka bor district ban pynjari da ka kyndon aiñ 144 CrPC, pynban ki paidbah kila leh bymsalia ia kane ka aiñ bad kila mih paidbah haka 26 tarik bad khang lynti iaki trok kit ñiut ka JMB da ki maw ki dieng bad kila hap ban leit phai sha Jowai.

Ka jingpyrshah ka ENCC ka dei halor ka nongrim ba lada ai lad ban bret ñiut ha katei ka jaka kan wanrah iaka jingktah iaka koit ka khiah ki shnong ba marjan bad ka sawdong sawkun ka mariang.