U Conrad Sangma u CM uba shemphang tam ha India, ong u Lat barim u Mooshahary hapoh USTM

Syllad | The Rising MeghalayaMarch 5, 2024

U Lat barim ka Jylla u Ranjit Shekhar Mooshahary ha ka 4 tarik Lber u la pynpaw ba u Myntri Rangbah ka Meghalaya u Conrad K Sangma u dei u CM u ba shemphang (civilized) tam hapoh ka ri India.

Haba leh burom ia ka lyngkhuh sngi iap jong u PA Sangma, u Lamphang barim ka Lok Sabha na Meghalaya ha ka jingialang ba la khot pynlong da ka University of Science and Technology Meghalaya (USTM) ha ka 4 tarik Lber, u Mooshahary u la ong ba u Late PA Sangma u long ka durkhmat jong ka thain shatei lammihngi (Northeast), u riewsain hima ba pawkhmat bad u briew uba trei minit iala ka jong ka kam.

“Kawei na ki jingjop kaba khraw ka long kumba long ma u, ki khun jong u ruh ki dei ki briew kiba lah shemphang, kim don kino kino ki jingkynnoh kam bamsap pyrshah ia ki. U Conrad Sangma u dei u CM uba la shai tam hapoh ka ri India,” ong u Lat barim.

U la ong ruh ba u Late PA Sangma um shym la ioh shuh ia ki artylli ki kam kiba hakhliehduh jong ka ri, kata ia ka kam President bad Myntri Rangbahduh (PM). “Mynta ka Meghalaya ka la kylla long kaba pawkhmat namar ki nongialam kum u PA Sangma,” u la ong.

Shi bynta ban rakhe ia kane ka lyngkhuh sngi iap u Late PA Sangma, ka USTM ka la pynlong ruh ia ka “7th Memorial Lecture” halor ka phang “Role of PA Sangma for Progressive Meghalaya” hapoh ka campud jong ka University ha kaba la wan ban iashim bynta ruh da u Chancellor ka USTM u Mahbubul Hoque, vice-chancellor Prof GD Sharma nalor ki dkhot, ki staff bad ki spah ngut ki samla pule.

Haba kren ha ka jingialang u Chancellor ka USTM u la ong ba kane ka University ka sngewnguh shibun ia u Late PA Sangma namar u don ia ka bynta kaba khraw ha ka por ba ai jingmynjur ia ka USTM Act hapoh ka iingdorbar thawain ka Meghalaya ha u snem 2008.

“U Late PA Sangma u dei u riew iohi jngai uba angnud ban kyntiew ia ki samla lyngba ka pule puthi.U la long ruh barabor u nonghikai bad u nongai mynsiem bad ka USTM ka sngewnguh shibun ia ki kam bha bha jong u, khamtam ia ka jingai jingkyrshan bad ka jingpynshlur ia ki sienjam ki jong ngi na ka bynta ban wanrah ia ki lad jingpule kiba kham shalor ha ka jylla Meghalaya,” ong u Hoque.U la ong ruh ba u Late PA Sangma bad u RS Mooshahary ki la long ki nongai jingmynsiem ha lyndet ka jingpynkha ia ka USTM.

“Ngi pynpaw ruh ka jingsngewguh ia u CM ka Jylla ha katei ka por u Late Dr Donkupar Roy bad ia u Myntri ka Tnat pule puthi barim u Manas Choudhury halor ki sienjam kiba ki la shim,” u la ong.

Shuh shuh u la ai khublei ruh ia u CM Conrad Sangma bad ia ka kynhun jong u halor ki jingai jingkyrshan bad jingiarap na ka bynta ka jingkiew shaphrang jong ka University.