U Khrist u dei ban ïap bad ban mihpat

Markus M ThaiangApril 1, 2021

Haba u Jisu u mih na ka shnong Bethania sha Jerusalem, ki paidbah Ju ha kata ka por ki da ia risa kmen bad pdiang ia u (Jisu) kum U Syiem, U Kynrad jong ki bad ki da risa iaroh kum U Messaia lane kum Uta uba ki la khmihlynti ban wan ban pynim ia ki. Ha kane ka sngi ba  wan rung u Jisu ha Nongbah Jerusalem, ki paidbah ki la dap da ka jingkmen da kaba ia ruwai iaroh “Ho  sano Hosana” hynrei pat tang hadien saw sngi kiba bun na kine ki paidbah ki dei ki juh ki briew bad na ka Hosana Hosana ka kylla pat “Sahnarphna Sahnarphna. Kumno kane ka lah ban long ba kine ki juh ki paidbah kin kylla ktien ?. Ki paidbah Ju ki dei ban kylla ktien khnang ban pynurlong ia kaba u Jisu u la iathuh kham mynshwa ba Un sa shah shitom bad shah iap khnang ban pynim ia ki khun bynriew shikhrum ka bneng shitylluk ka pyrthei.

U Issaiah uwei na ki Nongiathuhlypa u bakhraw da ki spah snem ha shwa ka jingkha ia u Jisu sha kane  ka pyrthei lyngba ka Mary ne ka Maria ka theisotti ka bakhuid tam. Haba u iathulypa ia kiei kiei ki ban sajia bad ha ka jingiohi paw jong u ia ka ban sajia shaphang Uta U Nongpynim jong ka pyrthei u ban sa wan u ong “ La pynmong ia u namar ka jingleh bymhok jong ngi, la shoh la sympat,la pynmong ia ka met jong u namar ki Pop jong ngi. Ka jingshoh jingsympat halor ka met jong u na ka bynta ka jingpyniasuk ia ngi da ka jingmong jong u la pynkoit ia ngi bad da ka jingiap jong u la pynim ia ngi.

U Jisu Khrist u Khun ba marwei jong u Blei bad u dei ban iap ban pynim ia u khun bynriew ha shikhrum ka bneng shitylluk Ka pyrthei bad haba la mon da u Blei Nongbuh Nongthaw ba u Jisu u dei ban iap ym don bor pyrthei kaba lah ban khang ia u Jisu na ka jingshah pyniap.

U Pontius Pilatus u briew uba don ka bor bad ka iktiar ban pyllait im iano iano lane ban phah pynshitom bad ban phah pyniap ia ki nonglehkam sniew. Une u briew uba don ka bor bad ka iktiar hadien ba u la tohkit sani bha um shem daw eiei ba u Jisu un shah pynshitom bad ban shah sahnarphna haduh ban da iap thadrong halor ka Diengphna ha Lum Kalbari pynban haba la mang da U Blei ba u Jisu u dei ban  iap na ka bynta u khun bynriew, u Pilatus Pontius u briew uba don ka bor bad ka iktiar um shym la pyllait ia u Jisu na ka jingshah sahnar bad shah pyniap thadrong halor ka Diengsahnarphna.

Ha kane ka jingshah pyniap sahnarphna jong u Jisu, ki jingthoh Baibel ki ong ba u Pilatus Pontius u la saitkhuid ialade ba um don kti eiei ha kaba pynshitom bein bad pyniap ia u Jisu da ka jingshah pyniap thadrong halor ka Diengphna pynban ki jingthoh ki ong ba u Jisu u la shah lehbein hapoh u Pontius Pilatus wat lada u la saitkhuid ialade.

Ia ka jingshah pynshitom bein bad shah pyniap halor ka Diengphna ki briew kim sngewphylla eiei naba ki jingthoh Baibel ki kren shai ba u Jisu u dei ban shah pynshitom bein bad shah pyniap na ka bynta ka jingpyniasuk ia u briew bad u Blei naba u briew bad ka briew kiba nyngkong ki la thom hukum bad pynlah hukum ha kata ka por kaba dang kynthong ka pyrthei.

U Rangbah shispah uba don hajan jong ka Diengphna, haba shim na ka jingphla jong u bad kito kiba la ia don lang bad u ha lum Kalbari, ki phla ba u Jisu u long da shisha U Khun jong U Blei bad Uba long hi ruh U Blei Uba don ka bor bad ka Iktiar. U Jisu u la pynkoit ia kiba pang, u la pyniohi ia kiba matlah, u la pyniaid beit ia kiba dkhoh, u la pynkoit ia kiba pang Nianglyngkut, u la pynroi ia ki San tylli ki Kpu Suwa, ia ar tylli ki Dohkha ktung haduh ba la dap bam palat ia ki sanhajar ngut ki paidbah, u la pynim ia kiba la iap, u la beh ia  Ksuid kiba long ka tynrai jong ki jingsniew baroh bad Uba la jop thiaw ia ka jingiap da kaba mihpat na kaba iap.

U Jisu u don kat kane ka bor bad ka iktiar lada u kwah ban lait na ka jingpynshitom bein bad na ka jingshah sahnarphna ha ki briew bad iap halor ka Diengphna u lah ban pyllait ialade da kaba jem eh pynban Um shym la pynibor eiei naba la thoh ba U Jisu Khrist u dei ban iap( Christ ought to have died) kum u ‘Langsait Pap na ka bynta u khun bynriew. La pynskhem shuh shuh ia kane ka jingong ba u Jisu Khrist u dei ban iap da u Ioannis Nongpynbaptist kaba ong “Ha khmih u Khun ‘langbrot jong U Blei uba wan ban kitnoh ia ki pap ki sang jong ka pyrthei”. U ‘langsait pap u dei ban shah knia bad shah pyniap na ka bynta ban sait ia ki pap ki sang jong u ne ka briew kiba la leh tam hukum pynlah hukum ia ka saindur jong U Blei.

U Lukas uwei na ki Nongthoh ia ka khubor babha U Jisu Khrist ha ka jingthoh jong u, u la thoh ia kine ki kyntien “ U Khun u briew Un iap kumba la rai U Blei”. U Ioannis Apostol, uwei  na ki Synran uba U Jisu u ieid eh, uba la iathiah iadem, uba la shaniah ha ka Shadem jong U Jisu ha ka miet ka jingkhawai kaba khatduh, uba la don ha kjat jong ka Diengphna ha ka sngi kaba U Jisu u iap halor ka Diengphna, u kdew ia kine ki kyntien “ Ka jingieid kaba khraw tam ba u briew u lah ban don na ka bynta ki lok jong u ka long ban aiti iala ka jingim na ka bynta jong ki”.

Shuh shuh u Lukas ha ka jingthoh jong u, u ong “Ki arngut ki Synran jong u Jisu bad uwei pat u briew uba dangleit jingleit na Jerusalem sha Emous, ha lynti ki ia kren para maki shaphang bun kiei kiei kiba la jia ha Jerusalem. Une u briew uba la ia iaid lang bad ki haba u iohsngew ba kine ki arngut ki Synran jong u Jisu ki ia kren ia ka jingjia ia u Jisu ba u la shah pyniap sdien halor ka Diengphna, u la kylli ia kita ki Synran.” Hato kam shym la dei ia u Jisu, u U Messaia  ba Un shah ia kita kiei kiei bad kumta un rung sha ka burom?. Shuh shuh u Lukas ha ka jingthoh jong u, u kdew ia kine ki kyntien. Ka “jingshah lehbein, ka jingshah pynshitom  bad ka jingiap jong u Jisu,ka long ka dak kaba U Blei lyngba U Khun jong u, U Jisu, u la siewspah ia u khun bynriew”.

La nang pynskhem shuh shuh ia katai ka jingong kaba la kdew haneng da ki kyntien jong u Petrus, u Synran uba radbah tam jong u Jisu kaba ong.” U Jisu u a siewspah ia u khun bynriew ym da ka Ksiar ka Rupa ne da ki Mar ki Matta ki bym dondor eiei, hynrei da ka snam bad da ka jingiap jong u”

Haba pynlum lang na ki jingthoh kiba kren shaphang ka jingim jong U Jisu bad ka jingshah pyniap sahnarphna jong u halor ka Diengphna ha ka sngi “GOOD FRIDAY” ki briew kim sngewphylla eiei naba ka jingthoh Baibel ka kdew shaikdar ba U Jisu Khrist u dei ban shah pyniap bad ban mihpat na ka jingiap ban siewspah ia u khun bynriew. Ka jingjop jong U Jisu Khrist ia ka jingiap  ka long ka jingjop ia ka pap ka sang bad ka jingjop ia u Ksuid  u Khrei uba long ka tynrai bad ka tyllong bah jong ki jingsniew baroh.