U khunlung uba bit khlam COVID-19 ha Jowai u shait u khlain

Syllad | The Rising MeghalayaAugust 5, 2020

Ka Medical Superintendent jong ka Dr. Norman Tunnel Hospital, Dr. D Nongpluh kala iathuh ba u khunlung uba la bit khlam COVID-19 u shait u khlain katba nangmih ki sngi.

“Une u khunlung uba 10 bnai udei uba ju shah sumar ha aspatal bad u don ka jingtlot haka jingheh jingsan, haka 28 tarik haka por mynmiet ula wan thiah pang namar ka jingshitom haka jingring pynhiar mynsiem. Ngi la shim ki nongmuna bad phah test bad haka 2 tarik Nailar la ioh ka report ba u bit iaka jingpang khlam COVID-19,” la ong ka Dr. D Nongpluh.

Ka Dr Nongpluh kala iathuh ba nyngkong la hap ban pyndait tyndong lyer oxygen ia une u khunlung, hynrei mynta ula lait na kane bad ula pyni ki dak ki shin ba u kham ioh bor bad u don ka met kaba shait kaba khlain.

Ha kaba iadei bad ki lad jingiada n aka jingpur ka khlam, ka Dr. Nongpluh kala ong ba naduh ba wan thiah une u khunlung ki khlem pyniakhleh bad la pynthiah haka isolation ward bad kiba don haka kyrdan high risk bad low risk contact ki don ar ngut kynthup iaka kmie u ne u khunlung.

Une u khunlung u don haka kyrdan C-category bad u donkam ban don haka jaka sumar ban ioh ka jingsumar kaba paka.

Ka Dr. Nongpluh kala pyntip ruh ba ka bor pyniaid hospital kala pynbiang lut ia baroh ki lad jingiada na ka khlam COVID-19 bad ki paidbah ba wan shim dawai kim dei ban tieng ban syier bad ka hospital kala bud lut ia baroh ki kyndon bala bthah ka tnad ka koit ka khiah ka sorkar pdeng bad sorkar jylla.

Une u khunlung uba bit pang khlam u dei na kawei ka shnong ha East Jaintia Hills District bad ka jngbuddien nangno u iabit khlam ka dang iaid shait shait. U kpa jong u don ka travel history (ka leit ka wan ne kiwei ki jaka sha kiwei), hynrei ula pyndep iaka quarantine.