U Kiri Dhar uwei na ki riew ïaleh laitluid jong ka Ri India

Syllad | The Rising MeghalayaNovember 23, 2022

Ka Jaiñtia Eastern College, Khliehriat kum ka dak jong ka jingrakhe ïa ka jingdap 75 snem jong ka jingïoh laitluid jong ka Ri India (Azadi ka Amrit Mahotsav) bad ka jingdap 50 snem pura jong ka jylla Meghalaya, ka Khasi bad ka History Department jong ka Kolej ki la pynlong ïa ka jingkren kyrpang halor ka phang “Ka jingim bad u synñiang jong u Kiri Dhar, Daloi jong Elaka Shangpung, u riewshlur bad u nongialeh laitluid jong ka Ri India (Special lecture on the life and contributions of  Kiri Dhar Daloi Elaka Shangpung, an unsung hero towards Indian National Movement) haka 10 tarik Naiwieng 2022.

Ïa kane ka prokram la ïalam da u Dr. Phervision Nongtdu uba dei u Principal jong ka College kum shongknor, ha kaba u la pynshai ruh ïa ka jingthmu jong kane ka prokram. Ha ka jingkren jong u, u la pynkynmaw ha kaba ïadei bad ka jingïoh laitluid jong ka ri India bad ka jingïoh ïa ka jylla ba pura bad u la pynpaw ruh ïa ka jingsngewnguh bad pyrto ïa kito kiba la pha ïa la ka jingim na ka bynta ka Ri bad ka jaitbynriew. Shuh shuh u Deibormi Nongpoh, u khlieh jong ka Department Khasi u la ai ïa ka jingkren lamkhmat (key note address) halor ka phang ka jingïoh laitluid jong ka Ri India bad ka jingïoh ia ka jylla Meghalaya. U la ïathuh shaphang ka jingïaleh jong ki nongindia pyrshah ïa ki bor jong ka sorkar phareng, ha kaba ki la mih ki nongïalam kum u Bal Gangadhar Tilak uba la khot “The maker of India Swadeshi Movement”, u Bipin Chandra Pal, ka Rani Lakmi Bai (Rani of Jhansi) u Ram Prasad Bismil, u Subhas Chandra Bose, U Mahatma Gandhi, U Pandit Jawaharlal Nehru bad kiwei kiwei de. Ha ka jingkren jong u, u la pynkynmaw ba ka jaitbynriew jong ngi ruh ka la pynmih bun ki nongïalam kum u Tirot Sing syiem, u Mon Bhut, u Kheiñ Kongor, ka Phan Nonglait kiba la pha ïa ka jingim ban ïeng ïaleh pyrshah ïa ka bor sorkar phareng (British rule). Katba na Ri Jaintia la mih u Kiang Nangbah, u Suwar Daloi (Daloi Elaka Sutnga), Long Lyngdoh (Raij Pamtadong), Kha Dhar (Raij Pamtadong), U Myllon Daloi (Daloi Elaka Mynso), Monchu Sumer (Elaka Raliang) ,u Kiri Dhar Daloi Elaka Shangpung bad kiwei kiwei.

Ha kane ka sngi u Finelyness Bareh MDC & EM jong ka JHADC u la kyrkhu kyrdoh ïa kane ka program kum u kongsan. Ha ka jingkren jong u, u la ai ka jingïaroh ïa ka Jaintia Eastern College kaba la ïaleh shitom ban pynlong ïa kum kane ka prokram ka ban ai jingtip ïa kiba bun khamtam ïa ki samla pule bad ruh ïa ka imlang ka sahlang.

Ha kane ka sngi u bah Heibormi Sungoh, Headmaster jong ka Khad ar Nor Upper Primary School, Shangpung uba long u nongkren (Resource person) u la ai ïa ka jingkren kaba kyrpang shaphang ka jingim bad ka jingnoh synñiang jong u Kiri Dhar, Daloi jong ka Elaka Shangpung ha kaba ïadei bad ka jingïaleh pyrshah ïa ki bor jong ka sorkar phareng ha ka por jong ka jingïalam jong u Kiang Nangbah. U la їathuh ba la kha ïa u Kiri Dhar ha ka snem 1823 ha ka shnong Shangpung, la ju khot ïa u da u Kiri Chaliang namar ba ka ryndang jong u kam da beit bha. Ha shuwa ba un long Daloi u la bat ïa ka kam Sangot bad long u nongїarap jong u Daloi ha ki kam ki jam jong ka shnong bad ha ka Elaka. Hadien ka jingkhlad noh jong u Riang Shylla uba dei u Daloi jong ka Shangpung, ki rangbah na ki Khad ar Nor ki la jied ïa u Kiri Dhar na ka bynta ban shimti ïa ka kam Daloi bad ban shim ïa kane ka bynta ki la pynskhem lyngba ka “Thmat-thohkhyndaw”. Kumta ha ka snem 1852 u la shimti ïa ka kam Daloi ha ka rta kaba ar phew khyndai snem. Hynrei ka jingshah lehbeiñ jong ki briew jong ka ri Jaiñtia ha ki bor jong ka sorkar phareng, kata kum ha kaba ktah ïa ki riti ki dustur, ka jingbuh khajna, ka jingjia ha Ialong ha ka sngi saitjaiñ jong ka 21 tarik 1860 ka la pynlong ïa kiba bun ban ïaleh pyrshah ïa ki bor jong ka sorkar phareng. Dei ha ka snem 1862 ba la jied ïa u Kiang Nangbah ban long u nongїalam ban ïaleh pyrshah ïa ki phareng bad ïa u Kiri Dhar ban long kum u nongmih khmat bad u nongaiktien (Spokeman) jong ka Jaiñtia Durbar. U bah Heibormi u la ïathuh ruh shaphang ka jingїaleh kaba la jia ha ka 20 tarik Kyllalyngkot 1862 ïa kaba la tip kum ka “Thma Jaiñtia”.

Kane ka thma ka long kaba jur bad ki їingshong jong ki briew sorkar kiba don ha Jowai ruh ki la shah thang bad shah pynjot ha ka 23 tarik kyllalyngkot 1862. U la pynkynmaw ruh ba haba ka jingïaleh ka la nangjur nangjur, ha ka 4 tarik Rymphang 1862, ki bor shipai ki la hiar sha shnong Shangpung ha kaba ka la mih ka jingїaleh pyrshah na ka liang ki briew jong ka Elaka ha ki bynta jong ka shnong Shangpung ha ka jingïalam jong u Kiri Dhar pyrshah ïa ki bor sorkar. Ha kane ka jingїaleh ha Shangpung u Kiri Dhar, Daloi jong ka Elaka Shangpung u la shah siat na ka bynta ka khlieh jong u bad u la khlad noh ha ka 5 tarik Rymphang 1862. Ka jingkren kaba u la ai ha kane ka sngi ka la long shisha ka jingmyntoi ïa kiba bun khamtam їa ki samla pule jong kane ka Kolej.

Ha kane ka sngi na ka liang ka Kolej ka la sam ruh ïa ki jingaisngewbha (Memento) sha kiba ha ïing jong u Kiri Dhar, Daloi bad sha ki katto katne ngut ki nongshah khot sngewbha kum ka dak ban pynsahnam ïa une u riew shlur uba la pha ïa la ka jingim ban da ïa la ka ri. Ïa kane ka prokram la pynkut da ka jingkren ai khublei na ka kong P. Syrpailin Phawa, Assistant Professor jong ka History Department Jaintia Eastern College,Khliehriat.