U Kishan Lyngdoh uba nyngkong eh na Meghalaya ban tied 268 ron ha ka Ranji Trophy

Syllad | The Rising MeghalayaJanuary 6, 2024

U Kishan Lyngdoh u la thaw ia ka rekod kum u player ba nyngkong eh na Meghalaya u ban tied artylli ki shispah ron (double century) ha ka jingialehkai cricket Ranji Trophy hynne ka sngi Saitjain, kata ha ka sngi kaba ar jong ka jingialehkai pyrshah ia ka  Arunachal Pradesh kaba la long ha Anand, Gujarat.

Kumjuh u Ram Gurung ruh u la kynjoh sha ka thong da kaba lah ban tied 100 ron ha ka sien mih ialehkai kaba nyngkong hadien ba ka Meghalaya ka la lah ban banbor ha kaba sdang jong ka lympung ialehkai.

Ka Meghalaya ka la lah ban pyndep ia ka jingialehkai ba nyngkong da 504/9 (Declared), kata da kaba tam haduh 410 hasdien ba ka Arunachal ka la shah rem noh hynnin ka sngi Thohdieng dang kaba ioh tang 94 ron.

Haba wanphai sha ka jingialehkai kaba ar ka Arunachal ka la ioh da 57/2.

U Kishan bad u Ram ki la bteng ia ka jingialehkai hynne ka step da kaba ioh bna tied 68 bad 61 khlem da tip ia ka thong kaba kin ioh pdiang. Ryngkat lang kine ki la dep lypa ban tied 133 hadien ka jinghap lai wicket bad kaba la bynrap shuh shuh sa da jan kumba 200 run hadien ba ka jingiatied paralok kan kut noh.

Hadien ka jingiaid kaba la kynjoh palat 68 over, u Kishan bad u Ram ki la lah ban tied haduh 326 run hashwa ba u Ram un shah pynhap noh da 132 run, kata kaba kynthup ia 17 tylli ki saw ron bad kawei ka hynriew na ki 217 ball.

U Kishan u la don ruh ia ka histori kaba iadei bad ka jingjop ha ka jingialehkai pyrshah ia ka Arunachal ha katei ka juh ka jaka ialehkai ha une u snem ba la dep ha kaba tang ma u, u ban lah ban tied shispah ron ha kane ka lympung Ranji Trophy, hynrei ha kane ka kynti kaba mynta u la lah ban ialehkai kham bha shuh shuh.

Haduh ba un da shah pynhap noh, u Kishan u la lah ban tied haduh 268 ron tang na ki 308 ball kaba la pynlong ia ka strike rate ba kan kynjoh shaduh ka 87.01, kata kaba kynthup ia 43 tylli ki saw ron bad kawei ka hynriew ron.

Na ka liang u President ka Meghalaya Cricket Association u Nababrata Bhattacharjee u la pyrto ia kitei ki arngut ki rangialehkai kiba la lah ban ialehkai bha.