U Kyrwoh na ka Seng Khasi Kmie, kitbok kitrwiang ïaka Seinraij Jowai ban beh thong ïaka khlam ka ngoh

Syllad | The Rising MeghalayaJuly 10, 2021

Para Kur-Para Kha, Para Kher-Para Mer bad ki lok-ki jor baroh,

Wat hapdeng kane ka saw-ka sian namar ka jingwan lyngshop jong ka tyrlep-ka tyrbun kaba la saphriang biang sa shisien ym tang ha kane ka Mei-ramew, Meirilum-Meirisan baieit ka jong ngi ki khun ka bri U Hynñiew Trep-Hynñiew Skum,Hynñiew -Wasa, Khasi- Jaiñtia hynrei, wat ha satlak kane ka snieh pyrthei pynban, nga sngew ba ngi dei ban ïa kmen lang da ka jingshit rhem bad sngew sarong ba ka Seiñ Raij, Jowai lyngba ka jing trei shitom bad duriap jong ki nongïalam ba radbah ka jong ki, hapoh ka jingïalam jong u President, General Secretary, Seiñ Raij Jowai ryngkat-ryngkat bad U Daloi Ka Ilaka, Jowai bad dei lyngba ka jingïohi jngai ka jong kine ki ‘riew rangbah-rangsan kiba la lah syndon ban pynkhreh shaid-shaid ban pynurlong ïa ka leh Niam Behdieñkhlam ha Nongbah Jowai mynta u snem ban beh thong ïa ka Khlam-ka ngoh, hapdeng shibun ki jingeh, jyrwit-jyrwiang bad diengpynkiang, kaba ki ïa kynduh mawsiang.

Ha kine ki sngi kiba long ki sngi ki ban dang hap ban pyndep ïa ka Niam ka Rukom, ka nguh Blei, ka dem Blei, kata; naduh ka 08 tarik bad ka ban pynkut ha ka 11 tarik U ‘Naitung, 2021 ha Aitnar, Jowai, na ka liang jong ka Seng Khasi Kmie, Mawkhar, Shillong bad kum u longsan-mansan jong ka Seng, nga ai ka jing ïaroh bad khublei kyrpang ïa ka Seiñ Raij, Jowai kaba la lah ban pynurlong ïa kane ka kam kaba radbah, wat la kane ka jingrakhe ban pyndep ïa ka Niam- ka Rukom, ki riti-ki dustur mynta u snem, la hap ban pynlong da kaba rit bad ban da bud ryngkhing ïa ki adong-adit bad jingmana jong ka Sorkar, khnang ban ïada na ka jingwan saphriang jong kane ka khlam-ka ngoh.

Ngam lah ruh khlem da ai khublei kyrpang ïa U Ma O.R.Challam, President, Ma Puramon Kynjing, Doloi Ilaka, Jowai bad ïa U Ma.Arwotki Sumer,General Seceratery bad ïa baroh ki dkhot nongkit kam jong Ka Seiñ Raij, Jowai kiba la ïa trei borbah met bad mynsiem ban pynkhreh,pynkhrum ïa kane ka leh Niam Behdieñkhlam mynta ka kynti, wat hapdeng shibun ki maw jingthut. Nga ai ruh ka kyrkhu-kyrdoh ryngkat ka duwai-ka phirat, ka kyrpad-ka kyrpon ha u Blei Trai Kynrad, U Nongbuh- U Nongthaw na jrong- ha tbian ba kane ka leh Niam Behdeinkhlam  ba shisien- shi snem ha shnong Jowai kan long kaba ïaid beit-ïaid ryntih, ba phuh-ba phieng, ba shong khia, shong sbai bad kaba jop bad ba u khun bynriew ka Bri u Hynñiewtrep-Hynñiew Wasa jong kane ka Mei-ramew un ïoh ka koit-ka khiah krat-khiah stang, ka im suk-im sain, im palei, tip briew tip Blei, hangne ha snieh pyrthei.           

Ha kane ka sngi ba kyntang, nga ai khublei Behdeinkhlam kyrpang ïa baroh ki kur-ki kha,ki lok- ki jor,ki kher- ki mer ka Bri U Hynñiew Trep-Hynñiew Wasa ba ksoh hala ka Niam,Tip briew-tip Blei ryngkat ka kyntu- ka kynpham ban nym klet, iehnoh, i-beiñ, niew beiñ, jyndat ne kdat na la kajong bad ïa la ka jong ka thymmei hynrei, ban sarong bad ri kyndong ïa la ka jong kaba da buh mawnongrim da U Men barim, Mei kulong-Pa kulong  ba da ïapan da  ka khnong-ka bishar ha ryngkat u ryngkew-u basa bad kumta, ka kamram kaba kongsan eh ka jong nga-jong phi kadei namar kata, ban pynneh, pynsah, pynsan, pynheh na ka bynta ki longdien-mandien ki jong ngi  kiban dang wan, ban im ka Niam ki Riti, Ki Dustur, ban im ka ka jaid bynriew. Kynmaw para kur-para kha, para kher-para mer, lada ka Niam, ka rukom, ki Riti-ki Dustur ki duh ki dam noh, kan bha ba kane ka jaidbynriew Ka Bri u Hynñiew Trep-Hynñiew Wasa  ruh kanduh-kandam noh syndon.

Kyntang ïawai, ba da ka jingdon ryngkat bad synran-synriah jong U Nongthaw-Nongbuh, nga ngeit skhem khlem artatien eiei ba, kane ka nguh Blei-ka dem Blei Behdieñkhlam ban beh ïa ka khlam-kangoh kan long kaba ïaid beit, ïaid ryntih bad ba kane ka khlam-ka ngoh kan duh-kan dam bad jah sha ba sep ka sngi, ba sep u bnai bad sha ka rngai. Ha kane ka bynta, na  ka liang jong ka Seng Khasi Kmie, Mawkhar ruh, lyngba Ka Kynhun U Tymmen U San, ngi la ïa shim bad leh la ka jong ka bynta bad kamram ha ka Duwan-ka Dupat ba kyntang, ha Kliar U Lum Sohpetbneng bad da ka jingïatrei lang ryngkat-ryngkat bad ka Seiñ Raij, Jowai, Seng Khihlang, Seng Kyntu Khadar Doloi ,Sengbah Nongshat-Nongkheiñ, Ka Lympung Ki Seng Khynnah, Niam Khasi-Niam-Tre bad baroh  ki Seng Niam Tynrai-Niam Tre, nga ngeit skhem ba ngin lah ban rat diengkhong ïa kane ka khlam-ka ngoh bad ïa baroh ki sai teh- sai khum , ki raieh-raidam, ki mawjynthut kiba ngi ïa kynduh mawsiang na ka por-sha ka por bad ba ngin poi sha ka thong ryngkat ka Hok, ka shi kyntien.

Sa shisien bad naduh ka mynsiem, nga ai Ka Behdieñkhlam ba suk, ba saiñ, ba kmen, ba phuh-ba phieng bad kaba jop lang ïa baroh.

Khu Hok, Khu Sot ,Khublei.

Rgh. DONKUPAR  DKHAR, IAS(retd),
President, Seng Khasi Kmie.
Mawkhar, Shillong.