U Kyrwoh na ka TUR halor ka kynrum kynram jingshna bam ba tei iaki khyllung khynnah ha Jylla

Syllad | The Rising MeghalayaJune 17, 2021

Ka Thma U Rangli Juki (TUR) ka ban jur ba ka don ka kynrum kynram kaba khraw ha ka jingpyntreikam ia ka SNP prokram jong ka ICDS. Ka jingїoh bat ne jingshem ia kumba shi lak bynri ki khaw kiba thmu ban shalan be aiῆ sha ka Jylla Assam ka pynshisha ia kane.

Ka TUR ka pynpaw ruh ba ka jingkren pynshai jong u Myntri Rangbah ka Jylla ka їaphnieng ne ka long їapyrshah bad ki hukum ba pher ba la ai da ka Supreme Court ka Ri naduh ka snem 2004 ter ter haduh ka hukum kaba dang shen kaba la pynmih ha ka snem 2019. Kine ki hukum ki kren shai ba ki tnat Sorkar kiba dei peit ia ka jingpyntreikam ia kane ka skhim ki dei ban pynїar ia ka rukom treikam bad ki dei ban їatreilang bad ki Seng Kynthei, ki SHG bad ki Seng ba pher kiba don ha ki shnong ki thaw khnang ban pynthikna ba ki bam tynrai kiba mih na ki shnong ne ba la rep bad thung da ki nongshong shnong ka Jylla ne ki kynhun jaitbynriew ha la ki shnong kin long ki bam kiba kongsan ban kynthup ha kane ka skhim jong ka ICDS.

Ym lah ban len ba ki don shibun jait ki jingbam kiba tei bad ba bha kiba mih ha ki shnong ki thaiῆ bad Jylla bapher kylleng ka Ri bad ki hukum jong ka Supreme Court ka long ba dei ban kynthup ia kine ki jingbam kiba mih ha ki shnong ha ka jingїakhun ban pynduh ia ki jingpang kiba pher kum ka jingpang khrew, jingpang snam bad ki jingpang raid kpoh jong ki khyllung khynnah. Ban pynkhlaiῆ ia ki kynthei kiba pun khun bad kiba dang ai buiῆ bad kumta ter ter.

Ka long kaba sngewsih ba u Myntri Rangbah u їalam bakla ia ki paidbah nongshsong shnong da kaba pule bakla ne khlem sngewthuh ia ka notification jong ka tnat Ministry of Women and Child Development ka Sorkar India kaba la pynmih ha ka snem 2014. U Myntri Rangbah u la їalam bakla da kaba ong ba dei ban ai da jingbam kiba la shna bad bynrap ryngkat ki kynja jingbam khlaiῆ lane kita ki fortified food. Kane ka long kum ka jingshukor namar ba ka Aiῆ NFSA 2013 kam shym ong ba dei ban pyndonkam ne sam tang da ki fortified food ne ki jingbam kiba la shna lypa ryngkat ka jingbynrap da ki jingbam kiba pynkhlaiῆ. Hynrei ka Ain NFSA ka kren shai ba dei ban ai bad sam da ki jingbam kiba tei bad dei halor kane ka nongrim ruh ba ka Supreme Court ka shem ba kane ka jingpyndonkam ia kita ki jingbam fortified food ka plie lad pynban ia ki kharkhana shna jingbam ba kin їoh bsuh kti ne bsuh khlieh, lyngba ki jingkhang dien, ha kane ka skhim jong ka Sorkar kmie kaba kynjoh haduh 5000 klur tyngka ha ka shi snem bad kane ka jingїadonkti jong ki kharkhana ne company shna jingbam kiba heh ka la pyntroin ia kane ka skhim kaba long na ka bynta ka jingkoit jingkhiah jong ki nongshong shnong.

Ka jingshisha- ka long ba katkum ka man tyngka 2020- 2021 ka bhah ba ka Jylla Meghalaya ka їoh ban pyntreikam ia kane ka skhim sam jingbam lyngba ka ICDS ka kot shaduh hynriew phew klur laiphew hynῆiew lak bad ar hajar tyngka. Ka jingkylli ka mih balei ba ia kane ka skhim la aiti bad ia kane ka pisa tyngka la kurup da tang kane kawei ka company ka Continental Milkose? Ka jingthmu hi jong kane ka skhim ICDS ka long ban sam ki jingbam kiba tei bad ym don jingartatien ei ei ba ki nongrep, ki nongdie bad nongshet jingbam tynrai, ki Seng Kynthei, ki SHG bad kiwei ki kynhun kiba don ha ka Jylla ki lah ban leh bad ban pynbiang da ki jingbam kiba tei ia ka met kiba mih na kane ka Jylla hi.

Kane ka 60 klur tyngka kaba dei ka bhah na ka bynta ban pyntreikam ia kane ka skhim ka lah ym tang ban bsa jingbam kiba tei ia ki khyllung khynnah, hynrei lyngba jong ka lah ruh ban ai kam bad kyrshan ia ki nonsengkam ha ka Jylla kiba la pyntbit ha ki kam shet jingshet bad ruh ka la lah ban kyrshan ia ki nongrep bad ki nongpynmih jingbam tynrai ha ka Jylla.

Don ar bynta ha kane ka skhim SNP- kawei ka long ban sam da ki jingbam ba ki briew ki hap ban shet ha ka anganwadi centre bad ar ki ration ba long ban rah sha iing. 

Ha ki khyndiat snem ba la lah la shem ba kane ka company continental Milkose ka sam bad shalan ia ki jingbam ki bym biang bad ki bym kot katkum ka jingthew ka tnat National Institute of Nutrition Hyderabad. La lap ia kane hadien ba la shim katto katne ki nongmuna na ki jingbam ba la shalan da kane ka company bad la rah sha katei ka jaka wad bniah kaba don ha Hyderabad bad la shem ba ki long ki jingbam kiba duna ha kiba bun ki liang. Bad la ong ba kine ki jingbam kim long kiba biang.  Ki khynnah khunlung ruh kim bang ban bam ia kine bad lah shu sep ei lut bad la shu pyndonkam noh ha kaba bsa jingbam ia ki sniang.

Lah ban ong ba ka jingbamsap ha ka jingpyntreikam ia ka SNP ka long kaba shyrkhei ha Meghalaya bad ym sngew phylla ban iohi ba ka Jylla Meghalaya  ka dei ka Jylla kaba bun tam ka jingdon ki kynthei kiba khlad ha ka por pun por kha bad ka dei ruh ka Jylla kaba bun ki khynnah kiba khlad ha shuwa ban kynjoh 5 snem ka rta.

Ka long kaei kaei kaba sngewsih ba u Myntri Rangbah ha ka jaka ba un shah skhor bad shim khia halor ka jingpynpaw ki paidbah haba ki shem ia ki jingduna ha ka jingpyntreikam ia kane ka skhim, u ieng ban iashah bad iada pynban ia ka company Continental Milkose.

Ngi lah ban kdew hangne ba ki Jylla Odisha, Kerela, Chattisgarh ki dei ki Jylla kiba la lah ban pyntreikam bha ia kane ka skhim ha kaba ki la pyntreikam lyngba ki Seng Kynthei bad ki Seng bapher bapher kiba don ha ki shnong bapher jong ki Jylla jong ki.

Ha ka jylla jong ngi ruh lah ban pyntreikam ha ka dur kaba janai kham bun shah da kaba iatreilang bad ki Dorbar Shnong, ki Seng kynthei bad ki Seng Samla jong ki shnong bad ki seng treimon sngewbha kiba bun bah. Ka sorkar ka dei ban pynsangeh shi syndon ia ki rukom treikam kaba rim kaba shah bad ailad ia ki babu sorkar, ki nongmihkhmat bad ki nongkhaii kiba heh ba kin tuklar bad pyniaid lahduh ia kine ki skhim kiba kongsan.

Ki Dorbar shnong, ki Seng bhalang bapher  ki dei ban pynlong thikna ia ka jingjurip bad jingthew ia ka jingtreikam jong kane ka skhim da kaba pyndonkam ia ka Aiῆ Social Audit bad ngi dawa ba ka sorkar ka dei ban pynsangeh noh shi syndon ban ai contract ha ka company kaba la don ka jingthoh bria.