U Ma Finelyness un long tang kum u MDC, um lah ban treikam kum u Chairman
JOWAI: Ka ïing bishar Meghalaya High Court kala pynmih ïaka hukum shipor ba kam shah ban pynïaid Dorbar u Chairman jong Jaiñtia Hills Autonomous District Council (JHADC) namar baka mukotduma kaba la ujor da u ma Awhai Andrew Shullai pyrshah ïaka Sorkar Jylla bad kiwei halor ka kam Chairman ka konsil kam pat kut.
Ban ïaid beit ka Dorbar Tlang kaba la pynbna ba kan long haka 28 tarik une u bnai Naiwieng, ka ïingbishar kala rai ïa kane ka dorbar yn pynïaid da u Deputy Chairman bad u Chairman un long kum u MDC bad u don ka hok ban vote bad kiwei kiwei ki hok bad ym lah ban treikam kum u Chairman tad haduh bala pynkut ïaka mukotduma.
![](https://www.syllad.com/wp-content/uploads/2024/09/JIT-Vacancy-823x1024.avif)
U Ma Awhai Andrew Shullai katkum mukotduma MC [WP(C)] No. 258 of 2019 ula kyrpad ïaka ïing bishar ban pynsangeh ïaka jingpynbna khot dorbar tlang ba dang ïaid ka mukotduma pyrshah ïa kam Chairman ka konsil.
Ka ïing bishar haka jingshong bishar ïa kane ka Mukotduma haka sngi Balang hadien ka jingshong bishar sani bha kala ong ba ym dei ban pynthud ïaka dorbar kaba la pynbna, hynrei ïa kane ka dorbar yn pynïaid da u Deputy Chairman bad u Chairman un long kum u MDC bad u don ka hok ban vote bad kiwei kiwei ki hok, hynrei ym shah ïa u Chairman ban pyniaid dorbar bad treikam kum u Chairman, tad haduh bala pynkut ïaka mukotduma.
U Ma Andrew MDC jong ka Congress ula ujor ïa kane ka Mukotduma katkum ka WP(C) No. 383 of 2019 pyrshah iaka State of Meghalaya bad JHADC namar ka jingkynnoh ba ïaid lait ïaka kyndon pynïaidkam jong ka JHADC ha kaban jied ïa u Chairman ba thymmai ka konsil hadien baka shuki Chairman kala thylli.
Kane ka shuki kala thylli hadien ba la iehnoh kam Chairman ka konsil u ma Lakhon Biam. U Lat ka Jylla ula khot dorbar haka 9 tarik ban rah ka resolution ban weng chairman bad bthah ïa u Deputy Chairman ban pyniaid dorbar ha kaba u Deputy Chairman ula pynbna ba shuki Chairman kala thylli bad ha ka juh ka sngi haka 9 Nailur 2019 la jied Chairman bad u ma Finelyness Bareh ula jop suk.
U Nongialam ka Liang Pyrshah u Ma Awhai Andrew Shullai, ula pyrshah ïa kane bad kynnoh ba u Deputy Chairman ula ïaid lait iaka kyndon pynïaid kam jong ka District Council halor ka jingjied Chairman namar ba u khlem ïoh bor na u Lat ban jied Chairman jong ka konsil.
Leave a Reply