U Monkiru um dei u trai shnong ka Pamrapaithlu

Syllad | The Rising MeghalayaJanuary 4, 2024

Ka Dorbar Shnong Pamrapaithlu ha u kyrwoh bala pyllait da u Waheh shnong, U Ma Leningstar Rymbai bad U Secretary Shnong Ma Lakshmon Siangshai halor ka jingmih khubor sha ki lad pathai khubor ha ba ia dei bad ka  jingjia shah pyniap Ka Kong (Late) Lita Ryngkhlem na ka shnong Wapung Shnong ba u nong pyniap u ba dei na ka shnong Pamrapaithlu u ba kyrteng U Monkiru Shyrmang 29 snem ka rta.

Ha ba ia dei bad kane ka jingjia na ka liang ka ophis dorbar shnong ka la pynlong ia ka Executive Body meeting ha ka 03/01/2024, ha hall jong ka Dorbar Shnong Pamrapaithlu, ban ia tai sani bha halor kane ka jingjia pyrshah ia u tei u briew u ba kyrteng u Monkiru Shyrmang ba kam ialade na ka shnong Pamrapaithlu.

Kumta na ka liang ka Dorbar Shnong ka kwah ban pynshai paidbah sha baroh ba ha ka jingshisha u tei u briew u ym dei na ka shnong Pamrapaithlu bad kum Ka Dorbar shnong kam ithuh ia u kum u trai shnong. Namar u ne u briew um don kawei ruh ka jingpynshisha ba u long u trai shnong jong ka shnong Pamrapaithlu, kata ka dei, 1. u ne u briew um don ia ka Voter identity Card ha poh ka Electoral rolls, 2.  Um don hapoh ka jinglumthup (Registration Record) hapoh ka rijister ka Dorbar Shnong kum ba don ki longing longsem bad ki nong shong shnong baroh.

Te halor kitei ki nongrim ka Dorbar Shnong kam lah ban pdiang ia ka jingkam U Monkiru Shyrmang ba u dei na ka shnong Pamrapaithlu bad ym lah hi ruh ban pdiang ba u dei u nongshong shnong namar kam long ka rukom bad kam ju don hi ruh ka jingshynshar khaddar shnong hapoh ka Dorbar Shnong Pamrapaithlu ban pdiang shnong ia u/ka briew khlem da don hapoh ka thup number ing kat kum ba la buh beit buh ryntih ia ki longing long sem baroh salonsar hapoh ka rijister shnong.

Khatduh, halor kane ka jingmih kyrteng ka shnong jongngi, ngi pynpaw ka jingpyrshah kaba jur ba kumno ka bor jong ka ain ka la pdiang ia kane haba khlem da ioh ia ki sakhi satar ba biang ban pynshisha ba u dei na ka shnong jong ngi ka Pamrapaithlu, bad kaba sngew thamula bad pynsngewsih ia ngi wat na ka  bor jong ka ain ruh ki khlem kynjoh ktein sha u waheh shnong shi kyntein ruh ban pynshisha. Kane ka long ka jingpynjah burom ia ka burom ka ijot jong ka Shnong jongngi Ka Pamrapaithlu.

Ka Dorbar Shnong Pamrapaithlu, ka la maham tyngeh ia ki briew ki ba shim kabu ban pyn jah burom ia shnong, lada dei na ki ophis sorkar ne nong pathai khubor ne ki sengbhalang ne ki riew shimet ba nangne shakhmat kan nym dei shuh ban dang jia shuh, te lada dang jia ka Dorbar shnong kan sa shim ki lad ki lynti pyrshah ia ki kat kum ka bor jong ka ain.

Na ka liang ka Dorbar Shnong Pamrapaithlu ka phah ruh kane ka jingsngewlem sha ki ba ha ing ha sem jong I kong (Late) Lita Ryngkhlem ba U Blei un kyrkhu kyrdoh ia ki khun ki kti jong I ba kin ioh ka met ka phad ba koit ba khlain bad un kyrkhu ia ki ha baroh ki liang.