U Mukul ula ieh shuwa iaka kam pynbeit pud, ka sorkar MDA ka copy paste: Erwin

Syllad | The Rising MeghalayaNovember 26, 2022

U Ma Erwin K Sutnga ula ther tyngeh ïa ka Sorkar MDA  ba ka dei ka Sorkar “Copy Paste” kaba la shu bud ïa ki kam bala dep leh da ka Sorkar MUA hapoh ka jingïalam jong u Dr Mukul Sangma ha u snem 2011 ha kaba iadei bad ka kam pynbeit ia u pud u sam ka Meghalaya.

Ia kane u ma Erwin ula ong haba kren haka jingialang thang mombati haka sngi Thohdieng kaba la pynlong da ki san seng kiba kynthup iaka KSU, FKJGP, JSU, HNYF bad ka RBYF ha Jowai kum ka dak ban pynpaw iaka jingsngewlem iaki san ngut ki nongshong shnong ka Mukroh kiba shah siat ha ki pulit Assam haka 22 tarik Naiwieng. Ha kane ka jingjia uwei u nongtrei ka forest Assam ruh ula khlad.

Ha kane ka jingïalang thang mombati la wan shimbynta da u president Synjuk Waheh shnong ri Jaintia u Ma Army Lipon, u Garlan Rymbai General Secretary barim ka JSU bad ki nongialam bad dkhot jong ki san seng.

U Ma Erwin uba long ruh u chairman Joint Action Committee Border of Meghalaya (JACBoM) haba kren ha kane ka jingialang ula ong ba ha kaba iadei bad ka kam pynbeit pud ha snem 2011, ka sorkar MUA haka jingialam u Mukul Sangma kala ieh noh shuwa ia kam pynbeit pud hadien ba ula iohi iaka jingeh namar ba bun ki shnong la kam bad kyntur ka Assam, hynrei kaba lyngngoh ka sorkar MDA pat khlem kano kano ka jingtohkit kaba bniah ia kam ïakajia pud haki khadar tylli ki jaka ba iakhajia, kala pynbeit noh shuwa iaki 6 tylli ki jaka ha ka wat kaba nyngkong kaba la dep ruh ban soi iaka soskular.

U ma Erwin ula ong ba ka sorkar Meghalaya ka iakren tang iaki 12 tylli ki shnong haka jingiakren pynbeit pud, katba ka shnong Mukroh kaba ka sorkar Assam kala kyntur ym shym la iakren. Ula buh jingkylli hato ka shnong Mukroh kan hap shapoh ka Assam.

U Chief Minister ka Assam Himanta Biswa Sharma ula kam ba ka Mukroh ka hap hapoh ka Assam hadien ka jingjia siat iap ki Pulit Assam iaki 5 ngut ki nongshong shnong ka Mukroh, la ong u ma Erwin.

U Ma Erwin u la ong namar ba u Conrad K Sangma ka dei kaba khawpud hadien ba kala mynjur ïa ka jingtohkit CBI halor ka jingjia ha Mukroh. “Lada u Conrad u mynjur iaka jingtohkit CBI iaka jingjia ha Mukroh, kumta u dei ruh ban mynjur noh mynta ïa ka jingtohkit CBI halor ki kam bam sap bapher bapher hapoh ka jylla,” la ong u ma Erwin.

U Chairman ka JACBOM u Ma Erwin K Syiem Sutnga u la kyntu ïa ki ba haing hasem jong ki san ngut ki briew bala shah pynïap ha ki bor pulit ka Assam ba kim dei ban pdiang ïa ka bai lutksan na ka Sorkar Assam namar lada ki pdiang ïa ka kan sa long kumba die duh noh ïa ka Shnong Mukroh sha Assam.

U la ai nuksa ruh ïa ka jingjia ha Langpih haba ka Assam ka la kam trai ïa ka Langpih namar ka jingpdiang ïa ka bai lutksan na ka Sorkar Assam da ki ba haïing jong ki briew kiba la shah pynïap ha ka jingsiat jong ki pulit Assam.

U la ïathuh ba ka JACBoM kala pynkhreh iaki kot ki sla kiba kynthup haduh 600 sla ban ïakhun pyrshah ïa ka MoU bala soi da ka Sorkar Jylla haka High Court of Meghalaya.

U Garland Rymbai, Secretary barim ka JSU haka jingkren ula ong kane ka jingjia ka jia dei na kadaw ka jingbym shai u pud u sam bad ka jingïoh ïaka jylla ruh kadei tang ka jingkyrkieh tang ban ïoh shong ha Secretariat khlem da pyrkhat ïaka pateng kaba shakhmat.

Une u nongïalam barim ka JSU ula ai jingmut ruh ïaki khun samla ban pynsangeh ïaka jingthep kyrteng haka elekshon ban wan bad lada wan synshar president rule ruh kam pher bad lada lah ban leh kumne tang hapoh 6 bnai la lah ban pynbeit ïa u pud u sam.

U Army Lipon president Synjuk Waheh shnong ri Jaintia ula kyntu ïaka sorkar Jylla ban pynbeit kloi ïa u pud u sam khnang ba ki nongshong shnong kylleng ka thaiñ khappud kin ïoh noh ïaka hok bad ka jinglaitluid haki jingtrei jingktah bad ban lait ka jingshah ñiewbeiñ ha kiwei ki jaitbynriew.

Ula kyntu ruh ïaka sorkar haba buh ïaki ktem pulit haka thaiñ khappud dei ban pynbiang ïaki tiar ki tar namar ka jingbym biang ki tiar ïaleh ka long thik kum ba buh ïaki dur bula kiba pynma kiba ju buh haki hali ki lyngkha ban pyntieng sim.

U Kwill Suchiang Secretary KSU East Jaintia Hills District ula pynrem ïaka sorkar MDA kaba lam khmat da ka NPP ba kam lah ban ai jingïada ïaki nongshong shnong ka thaiñ khappud.

U Hoping Muskut Waheh dong Mukroh ula ther tyngeh ïaka sorkar Jylla bad kynnoh ba ka leh shilliang khmat ïaki San ngut ki nongshong shnong jong ka shnong Mukroh da kaba pynkit ïaki tang ka met suda hadien ba la pyndep ïaka Post mortem ha Jowai Civil Hospital Ïalong katba ïa u bar Jylla ka sorkar ka pynthied da ka synduk kaba rem dor bad pynlut de sa ka bai umphniang bad pynpoi ïa u sha Assam.

Ha kane ka juh ka sngi, ka Joint Action Committee Ri Loom Jaintia kaba kynthup ïa All Jaintia Commercial Vehicle Association, Meghalaya People United Front , Jaintia Youth Federation, Hynniewtrep National People Federation, Hynniewtrep Women Welfare & Development Organization, Ri Loom Jaintia Trader Association ki la pynlong ia ka jingthang mombati ha Lad Soomer, Jowai By Pass.

Ki nongkren  baroh kane ka jingialang ki la pynrem jur ïa ka jingleh jong ki pulit bad nongtrei Forest jong ka Sorkar Assam bad ki la dawa ïa ka Sorkar Meghalaya ban pynsted noh ïa ka jingpynbeit pud pynbeit sam bad ka Sorkar Assam khnang ban lait na kano kano ka jingkulmar bad jingduh ki mynsiem kiba lui lui kumba jia ha Mukroh.