U paidbah ula ngiah iaka sorkar High Level, yn thaw sorkar ka Congress kop u PN Syiem

Syllad | The Rising MeghalayaJanuary 5, 2023

U Bah PN Syiem u Chief Executive Member barim ka KHADC bad u MDC ka Mawkhaw Pynthorumkhrah ula ong ba u paidbah ula ngiah iaka sorkar MDA- ka sorkar High Level bad Congress kan thaw iaka sorkar kaba thymmai.

“Ka Sorkar Meghalaya Democratic Alliance (MDA) ka la pynkylla ïaka Secretariat bad ka Assembly kum ka ATM ban shna pisa bad ki nongïalam ka sorkar MDA haka jaka ban shna ïaki aiñ ban īada ïaki nongshong shnong, ban ai kam ai jam, ban roi ban par, ban pynim ïaki īew ki hat hynrei ki la klet ïa kine namar ba ki la bunkam ka shakri khaīing dewïong,” la ong u Bah Syiem uba long ruh u working president ka MPCC.

U Bah Syiem haba kren haka jingialang ha madan shnong ka Iooksi haka sngi Palei ban pan iaka jingkyrshan na u paid jong ki 13 tylli ki shnong na ka thain Iooksi ia u kyrtong Congress na Mowkaiaw u Nehemayah Tyngkan, ula kren kop ba ka Sorkar MDA kan sa kut noh mynta u snem bad yn sa thaw sorkar thymmai da ka party Congress namar ki paidbah ki lah ngiah ïaka sorkar High level bad ki la sngew donkam da ka sorkar Low level ban im ka shnong ka thaw, ki Raij ki shnat, ki elaka ki dolloiship bad ban im suk u khun u hajar ka jylla.

Shuh shuh ula ong kiba bun ki ong ba Congress kam lah shuh ban thaw Sorkar namar kam don briew shuh bad ula pynkynmaw ïa u (L) Dr. F.A. Khonglam wat la u long marwei kum u Independent Candidate u dang lah ban long u Chief Minister ka sorkar Jylla. Ula ong kumta kam long kaba eh ïaka Congress ban thaw sorkar ha kane ka kynti ban wan bad ha u 2023 ka Congress kan jop na Mylliem, Mawkyrwat, Mowkaïaw bad kiwei kiwei ki Constituency.

Ula bein jur iaka BJP kaba la lehbeiñ ïaki niam bapher bapher ha man la ki jaka haki jylla bapher bapher ka ri India. Kumta ka la donkam kyrkieh ïaki nongshong shnong ban phai khmat bad kyrshan ïaka party Congress khnang ban ïoh sa shisien pat ban im laitluid hala ka jong ka ri bad ka jylla.

Ula kynthoh ba hapoh ka jingïalam ka sorkar MDA haka Jylla, shibun ki jingeh ki jingjynjar ba ki paidbah ki la mad kynthup naduh ka jinghiar ka ïoh ka kot bad haka por ka khlam Covid 19, ki paidbah ki mad shibun ki jingeh katba ki myntri ka sorkar MDA pat lap sngi ka thied khyndew ha Ribhoi da ki 7-8 klur tyngka.

U Bah Syiem ula pynkynmaw ruh ïaka jingleh jong u Dr Mukul Sangma haka por ka jinglong Myntri rangbah ka Jylla da kaba wanrah ïaka aiñ pynduh bor ïaki rangbah shnong bad ka mait kyrteng kata bym long ban bat kam MLA-MDC bad ula ong ba dei ma u uba la ïeng pyrshah ïa kitei ka aiñ.

U Bah Pynshngaiñ ula ong ba kum u nongïalam na ka bynta ka ri bad ka jaitbynriew ula ïeng skhem khlem resign kum MDC bad haba u khlem resign ha kaba kut ha High Court ka ong ba ym lah ban mait kyrteng ïa u namar u khlem shong haka ophis kaba hap haka sorkar jylla hynrei u shong haka ophis kaba hap haka 6th scheduled.

Ula pynkynmaw ruh ïaki aiñ ki kanun ba la wanrah da kiwei ki sorkar kum ka jingpyrshang ban pynrung ïaka CAA, ka jingbymailad shuh ban tih ïaki marpoh khyndew na ka ri lajong bad kiwei kiwei ki aiñ kiba ktah haduh katta katta ïaka Ri bad Jaitbynriew Khasi-Pnar.

U Bah Syiem haba kyntu ïaki paidbah ban jied ïa u nongmihkhmat ha kane ka election MLA 2023 kiba long ki nongiada iaka ri ym ki die duh iaka ri.

Ha kaba iadei ba ka kam iakhajia khappud, u Bah Syiem ula pynpaw ruh ka jingsngewsynei ïa kane ka dong ka thaiñ khamtam ki shnong ha khappud Meghalaya bad ka Assam namar ka jingshah lehbeiñ, ka jingshah khñiot beiñ haki pulit jong ka Assam na ka por sha ka por bad ula pynkynmaw ruh ïaka jingjia kaba dang shu jia shen haka shnong Mukroh kaba hap haka elaka Shilliangmyntang ka dei kaba ym lah shuh ban klet hadien ka jingkyllon iap jong ki 5 ngut na ka jingthombor ki pulit Assam.

Ula kren bynniaw halor ka jingduh ban khlong shyiap kh;long maw bad ban wat tih ia u mawshun dewiong namar ka jing teh da ki aiñ ka India kiba ktah ïaka thymmei ïaka jinglong tynrai, ïaka jinglong trai shnong bad ïaki riti dustur.

Ula kynnoh ba ka daw hi ka long ba ki paidbah ki la phiel ban jied ïaki nongmihkhmat. “Ka UDP, NPP, PDF, HSPDP bad BJP ki la phiel ban pyndep ïaka kamram na ka bynta ki nongshong shnong bad ki la shuh kut tang haka jingbuh maw nongrim kumta ki paidbah kim dei ban ngop ha kine ki nongïalam jong ka sorkar MDA.