U President ka VPP u dei u nongialam sain pyrthei uba dang duna ka jingshemphang, ong u Dy.CM

Syllad | The Rising MeghalayaFebruary 11, 2025

U National General Secretary ka National People’s Party (NPP) bad Symbud Myntri Rangbah ka Jylla, u Bah Sniawbhalang Dhar ha ka 10 tarik Rymphang u la ther tyngeh ia u President ka Voice of the People Party (VPP) u Bah Ardent Miller Basaiawmoit da kaba ong u dei u nongialam seng sain pyrthei uba dang duna shibun ha ka jinshemphang.

Haba kren ha ka jingialang ialap elekshon ha Biar bad Rtiang ban pan jingkyrshan ia u kyrtong ka party na Raliang constituency u Bison Roy Iano, u Bah Dhar u la ong, “Khlem ka jingshemphang kan long kaba eh ban shakri ia u paidbah. Kumta, ngi donkam ia ki nongialam kiba tbit namar ka long kaba kongsan haduh katta katta. U Myntri Rangbah ka Jylla u Conrad K Sangma u dei u draibar jong ka bus ka MDA ba la ialam da ka NPP mynta lah 7 snem kynthih. U dei u draibar uba la tbit bad shemphang bha, ngim donkam ban khuslai.”

“Hynrei, u president ka VPP u la long teng u CEM ka KHADC hynrei tang hapoh hynriew hynniew bnai ka EC jong u ka la khyllem noh. Tang namar u Mukul Sangma bad namar ka jingtieng ia ka jingshah mait kyrteng, ma u ruh u la iehnoh ia ka kam MDC. Kine ki la wan jia namar u dang duna ka jingshemphang kum u nongialam sain pyrthei,” ong u Dhar ha ka jingialang ha Rtiang .

U la ong ruh, “Ka jingkren jong u President ka VPP ba ka kam sang kam don satia ha ki shnong nongkyndong ka dei ka jingpynshlur ia ki kam shongsang kaba pyni ia ka jingbym shemphang kum u nongialam. La tip bha ruh halor ki kam wad daw jong une u nongialam ka VPP bad ki Rangbah Shnong, hynrei ka party jong u ka dang kam ba ki ieit jaidbynriew. Kumno phin ieit jaidbynriew lada phim lah ban shaniah wat tang ia ki nongialam shnong?”

Haba kynnoh ba ka don ka jingiapait iapra hapoh ka VPP u Bah Sniawbhalang u la ong, “Ki don sawngut ki MLA bad uwei na ki mynta um don shuh bad ka party. U Prah u la kylla Pra. Dei tang ha ka seng VPP ba ia ki tiket na ka bynta ki kyrtong MDC la ai khlem da shim ia ka jingai jingmut lang jong ki MLA. Kane ruh ka paw ba u nongialam ka party u dang duna shisha ha ka jingshemphang.”

Haba kyntu ia ki paidbah ba kim dei ban shah ialam bakla ha ki jingkynnoh ba ka NPP bad ka BJP ki dei ki juh, u Dy.CM u la ong, “Kumno ka Kot bad u Syntiew kin dei ki juh. Sngewbha wat shah pynngop ha kum kane ka jingpyrshang ban ialam bakla ia phi. Ka NPP kadon la ka jong ka rukom pyrkhat kam bad ka jingithuh.”

Nalor kata u la kam ruh ba ka Jylla Meghalaya ka la bteng ban ioh ia ki kam pynroi namar ba ka sorkar ba la ialam da ka NPP ka la iatreilang bad ka Sorkar Pdeng bad ong, “Ym kum kiwei pat ki jylla, kata kum ka West Bengal ha kaba ka CM ka ju kynthoh barabor ia u Myntri Rangbahduh ka ri bad ioh ia ki kam pyntoi kiba tang khyndiat eh.”

U Bah Sniawbhalang u kyrpad ruh ia ki paidbah ba kin vote ia u Bah Bison Roy Iano khnang ban pynthikna ban ioh ia ka sorkar ar enjin hadien ka elekshon ADC. “Ngi kwah ban pynthikna halor ka roi ka par ha baroh ki liang,” u la bynrap.

Ha kajuh ka por u la pynthikna ruh ban weng ia ki jingeh ba ki nongniah trok ki iakynduh bad ong, “Nga kyntu ia phi ban ai ka jingkyrshan ia ka sorkar.”

Kham hashwa ha ka jingkren ha Biar, u Dhar u la ong ba ka VPP ka la kam ba tang ka jingieit jaidbynriew ka la biang bad ym donkam satia ia ki kam pynroi.

“Hynrei, na ka bynta jong nga, lada phi ieit ia ka jaidbynriew, phi dei ban wad ia ki lad ki lynti ban wanrah ia ki kam pynroi sha ki paidbah bad ka jylla,” u la ong.

U la kynnoh ruh ba kiba bun ki briew ki la kyrshan ia ka VPP ha ka elekshon MP ba la dep tang namar ka jingrwai elekshon.