U Ramesh bad kiba haiing hasem jong u kim dei na ka kur Dkhar: Seng Kur Dkhar East Jaintia Hills

Syllad | The Rising MeghalayaSeptember 22, 2022

Hadien ka jinglap jong ka Sein Kur Dkhar East Jaintia Hills halor ka jingpyndonkam bakla u Ramesh Dkhar bad kiba haiing hasem jong u baroh ia ka Kur Dkhar  kum ka kur jong ki wat ha ba kim dei satia na ka Kur Dkhar paka ruh, ka la khot hajir ia ki (ba ha iing ha sem jong u Ramesh Dkhar) ha ka ophis treikam jong katei ka Seiñ Kur Dkhar, bad  ha khmat ki nongialam jong katei ka Seiñ Kur Dkhar, ki la kular ban pynduh pyndam noh shisyndon ia ka Kur Dkhar kum ka Kur jong ki bad ban ai Kur noh da kawei  pat.

Ka Seiñ Kur Dkhar East Jaintia Hills, lyngba u kyrwoh na u President jong ka, u Teras Dkhar, ka kwah ban pynshai sha u paidbah ba, u Ramesh Dkhar bad ki ba haiing hasem jong u baroh, kim dei satia  na ka Kur Dkhar hynrei  ki la pyndonkam bakla ia ka Kur Dkhar kum ka kur jong ki hadien ba ki la wan na Silchar, Assam bad shong sah noh ha ka shnong Tongseng East Jaintia Hills, bad ba, dei hangta ba, naduh u snem 2000, ba ki la  pyndonkam ia ka Kur Dkhar kum ka Kur jong ki khlem ka jingioh jingbit na ki nongialam jong ka Kur Dkhar, kaba la long pyrshah ia ka riti dustur bad ka hok nongkynti halor ka jingkheiñ kur kheiñ jait jong ka Kur Dkhar hi baroh kawei kat kum ba la hikai bad ioh pateng na ki longshuwa man shuwa jong ka kur Dkhar.

Ym tang katta, ban pynshisha shuh shuh halor kane ka jingbym  dei jong u Ramesh Dkhar bad kiba haiing hasem jong u kum ki doh ki snam bad ki kur ki jait ba paka jong ka Kur Dkhar, u hynmen jong u Ramesh Dkhar, u la iashongkha noh bad kawei ka kynthei kaba dei na ka Kur Dkhar paka hi, kaba na ka shnong Nongsning, East Jaintia Hills bad ki la iadon mynta haduh 5 ngut ki khun, ka kam kaba sang bha lada dei para Kur Dkhar.

Pule | Bom iap u paidbhur ia u I Love You bad 3 ki koidi ba phet na jail Jowai

Ha ka juh ka por ruh, ha ki jingkhot hajir jong ka Seiñ Kur Dkhar East Jaintia Hills ia kiba  ha iing hasem jong u Ramesh Dkhar ban wad jingtip kham bniah halor ka jingpyndonkam bakla jong ki ia ka Kur Dkhar kum ka kur jong ki, wat ha ba kim dei satia na ka Kur Dkhar, ki la phla ruh baroh ha ryngkat bad ki jingthoh jingtar ba biang ha khmat jong ka Seiñ Kur Dkhar ba kim dei satia na ka Kur Dkhar lane ki doh ki snam jong ka Kur Dkhar bad ba, ki la pyndonkam bakla ia ka Kur Dkhar kum ka kur jong ki na ka bynta ka jingmyntoi shimet jong ki, dang ha kine ki  phew snem ba la dep. Ia kane la sakhi ruh lyngba ka dur election jong ki lem bad kiwei kiwei de ki kot ki sla jong ki.

Kumta, ha ka jingiadei bad kane ka kam beaiñ jong kiba ha iing ha sem jong u Ramesh Dkhar, ka Seiñ Kur Dkhar East Jaintia Hills, hadien ka jingiakren sngewthuh jingmut bad ki,  bad ruh hadien ba da ka mon la jong, jong ki hi baroh, ba ki la kyrpad bad kular  ha khmat jong ka  ka Seiñ Kur Dkhar, ban ai por ia ki hapoh lai bnai ban pynduh pyndam hi noh da lade baroh na kaba kam kur ia ka Kur Dkhar, ha kaba ka Seiñ Kur Dkhar ruh ka la pdiang ia kane ka jingkyrpad bad ki jingkular jong ki, bad ruh ba dei na kane ka daw, ba ia mynta hi, ka ka Seiñ Kur Dkhar, kan ym pat shim ia kano kano ka sien jam kaba tyngeh pyrshah ia ki, hynrei kan  peit bad ap shuwa ia kaei kaba ki la kular ha ryngkat bad ki jingthoh ha khmat jong ka ka Seiñ Kur Dkhar.

Hynrei, hadien ka jingkut noh jong katei ka lai bnai ba la pan da kiba ha iing ha sem jong u Ramesh Dkhar, lada lap ba kim shym la leh kat kum ba ki la kular ha khmat jong ka ka Seiñ Kur Dkhar, ka ka Seiñ Kur Dkhar kam banse ban shim da ka rai kaba tyngeh bha pyrshah ia ki.

Sd/-
Teras Dkhar
President
Seiñ Kur Dkhar, East Jaintia Hills.