U Ramesh u donkti ruh ban pyniap iaka longkmie nalor ki nongniah kali mih pynrem ka shnong Tongseng

Syllad | The Rising MeghalayaSeptember 9, 2022

Ka Dorbar Shnong Tongseng Narpuh ryngkat ka Khasi Student Union, Tongseng Narpuh Unit ki la pynlong ka jingïaid paidbah ne ka rally ban pynrem ïa u Ramesh Dkhar bad ka kynhun jong u kiba donkti ban pynïap dusmon ïaki arngut ki nongñiah kali kamai ne tourist ha une u bnai bala dep.

Ia kane ka jingiaid rally ka dorbar shnong Tongseng kala pynlong haka sngi Palei.

Kane ka jingiaid paidbah kala sdang napoh shnong sha surok bah ha kaba ki nongshong shnong kynthei bad shynrang ryngkat ki jingthoh pynrem kila dawa ïaka hok na ka bynta kitei arngut ki nongniah kali kiba la shah pyniap.

Ki nongshong shnong ka Tongseng Narpuh haka jingmih paidbah baroh ki dawa ban set byndi shirta jingim ne sdien phasi ïa u Ramesh Dkhar bad ka kynhun jong u namar ki long ka jingma ïaka imlang sahlang.

Lah ban pynkynmaw ba I Love You Talang, Ramesh Dkhar, Tellme ba tip ruh kum Bor Pyrtuh bad Sampher Ksoo ki dei ki suba donkti ban pyniap iaki ar ngut ki nongniah ban ioh rongtuh iaka kali u (L) Fullmoon Kharsahnoh uba kamai kali Jowai Shillong bad u (L) Damehipaia Papeng uwei pat u nongniah kali kamai na Jowai Ladrymbai Khliehriat.

U Waheh Shnong ka Tongseng Narpuh u Ma Chewanbiang Rymbai, u Secretary Shnong u Ma Saman Phniaw ki la ong, ba u Ramesh Dkhar udei trai Shnong na Tongseng Narpuh naduh ka sngi ba la kha la pun ïa u.

Kine ki nongïalam shnong ki la ïathuh bad pynkynmaw ba u Ramesh Dkhar ha u snem 2020 ula shah kynnoh ba u pyniap iaka longkmie kaba na kane hi ka shnong. Hynrei ki pynpaw ka jingsngewsih ba tang hadien shisnem une u Ramesh Dkhar ula lait jamin noh.

Shuh shuh ki la ïathuh ba naduh utei u snem ka Dorbar Shnong ka la kyntait ïa u Ramesh Dkhar ba un don hapoh ka shnong ka thaw namar ka jingdon jong u ka buh jingma ïaki nongshong shnong bad ïaka imlang sahlang.

Kine ki nongïalam shnong ki la phah ka khubor sngewlem shaka ïing ka sem jong kitei ki arngut ki lanot ba kin ïoh ka met kaba koit bakhiah bad ba U Blei Trai Kynrad un theh ki jingkyrkhu bad kyntu ruh ïaka sorkar ban ai ka jingïarap sha ki longïing jong kitei ki arngut ki lanot.