U Robinus Syngkon MLA barim u kyrtong ka Trinamool Congress na Raliang

Syllad | The Rising MeghalayaJanuary 21, 2023

U Ma Robinus Syngkon u MLA barim ka Mowkaiaw bad u MDC ka Raliang mynta ula pynbna ban aireng iaka elekshon MLA na ka All India Trinamool Congress (AITC) na 3 Raliang Constituency kaba jingthep vote mynta ka kynti kan long haka 27 tarik u Rymphang 2023.

Ka 3 Raliang Constituency haduh mynta ka don san ngut ki candidate kiba la pynbna ban aireng kynthup ia MLA Raliang u Ma Coming One Ymbon na ka NPP uba la long MLA la lai samoi, u J Treilang Suchiang MDC ka Shangpung uba dei u kyrtong jong ka UDP, U Lakhon Biam MDC ka Nangbah uba dei u kyrtong jong ka BJP bad Shemhok Garod kyrtong ka PDF.

U Ma Syngkon ula ïathuh ba ka jingai reng jong u ha kane ka election MLA ka long namar ba u thrang bad angnud ban shakri ïaki paidbah bad ban kyntiew ïaka roi ka par ha baroh ki liang bad ban weng ïaka jingeh jong ki samla khamtam haka iohkam iohjam.

Ula iathuh bun ki jingeh bad jingduna ha JHADC kiba kim lah ban pyntyllun iaka kam kum ki nongmihkhmat. “Haba u thmu ban leh ïaka kam kaba bha hynrei ula shah pynhiar shuki pynban bad kane kala pynlong ia nga ban iakhun iaka elekshon MLA,” la ong u ma Robinus.

Ula kyrpad ïaki paidbah ka 3 Raliang ba kin ailad bad kyrshan ïa u ha kane ka kynti khnang ba un lah ban pynurlong ïaki jingthrang jingangnud jong u ban shakri ïa u paidbah.

Ha kaba ïadei bad ka jingjied jong u ïaka TMC ula ïathuh ba kadei ka party kaba lah ban wanrah shibun ki skhim pynroi ki ban pynmyntoi ïaki nongshong shnong ka Jylla.