U Sebastian Suting u BFI Referee ba nyngkong eh na West Jaintia Hills

Syllad | The Rising MeghalayaJune 24, 2024

U Sebastian Suting u la kylla long uba nyngkong eh na ki nongshong shnong napoh West Jaintia Hills u ban ioh pdiang ia ka kyrdan Panel B BFI Referee.

Ha ka shithi sha u General Secretary ka Meghalaya Basketball Association, na ka liang u Secretary General jong ka Basketball Federation of India (BFI) u la pynthikna halor ka jingmynjur ia kane ka jingjied sha ka Panels A & B ha ka jingialang ka jong ki kaba la long ha Chennai ha ka 8 tarik Jylliew.

Napdeng kiba pat kiba la shah jied na Meghalaya nalor u Sebastina Suting, kiwei pat ki kynthup ia u Fring Frank Lyngdoh Lyngkhoi bad u Rakbir Lishan B Sangma.

U Sebastian u la shim ia ka bynta ban pyniaid (officiated) ha ka 73rd Junior National Basketball Championship ha Bhubaneswar kaba la long ha u bnai February 2024. U Fring Frank Lyngdoh Lyngkhoi bad u Rakbir Lishan B Sangma ki la iashim bynta ha ka 48th Sub-Junior National Basketball Championship ha Puducherry ha u bnai Nailar 2023.

Haba pynpaw ia ka jingsngewnguh ka jong u, u Sebastian u la ai khublei kyrpang ia u Bah James Mardor Bamon uba dei u BFI Panel A referee halor ka jingkyrshan ka jong u. U Sebastian u la ong, “Ban kylla long u National Referee uba nyngkong napoh West Jaintia Hills ka dei ka khusnam kaba khraw halor ka jingtrei shitom kaba Nga la iakynduh. Ban tip ia baroh ki kyndon kiba iadei bad ka jingialehkai Basketball bad ban pynneh ia ka jinglong ha ka met ka phad ka dei ka bynta kaba shem jingeh shibun khamtam namar ka jingduna ia ki tournament happoh ka district jong ngi.”

Ha kajuh ka por u kyntu ruh ia ki player ialehkai napoh West Jaintia Hills ba kin trei minot bad kyrpad ruh ia ki Basketball Association hapoh ka district ba kin pynlong ia ki interschool tournament khnang ban pynshlur bad ai mynsiem ia ki khynnah don sap kiba dang khie dang san.