U Snem Thymmai 2022

Syllad | The Rising MeghalayaJanuary 1, 2022

U Snem Thymmai 2022, u la wan ban iuh kjat, ha kaba u khun bynriew ha satlak jong kane ka snieh ka sla pyrthei, u la dep ban dem ngon ialade ha ka jingdwai, ryngkat ka jingkyrmen, ba un dei u snem u ba dap kyrhai, la ha ka liang jong ka trei ka ktah, ka kamai ka kajih, ka koit ka khiah, ban biang ka pule ka puthi, ka rep ka riang bad kumta ter ter, da kaba u bynriew u la em ba un ia pan hakhmat U Blei Trai Kynrad, ia kine kiei kiei baroh.

Ha ki ar snem, ka pyrthei ka khihwin na ka jingwan ban lyngshop jong ka jingpang Coronavirus, ne Covid 19, dei ha kine ki ar snem, ba ka iaid ka ieng, ka trei ka ktah, ki kam ki duk ka kamai kajih, ka la shah ktah jur bha ha baroh shi snieh jong kane ka sla pyrthei, hadien ba ka jingwan ban sar jong kane ka jingpang, la khang lad khang lynti lut ia ka jingim kaba man la ka sngi, ha kaba ka lad ka lynti ban iada ia ka jingpur ne saphriang jong kane ka jingpang dei tang ban shu khangdam bad kumjuh da ka jingai ia ka tika ban iada (vaccination).

Pynban, katkum ki jingkhein jingdiah na ka shnat ka World Health Organisation ne ka WHO ka jingioh kem ki briew ia kane ka jingpang ha kane ka sla pyrthei ka long haduh 281808270 bad kiba iap baroh ka kynjoh shaduh ka ka 5411759 (kane ka thup kadei ba ka WHO ka la pyllait lyngba ka lad pathai jong ka ha ka 29 tarik u Nohprah 2021).

Kumba ka long ia mynta, ka pyrthei ka dang iai don sah hapdeng ka jingwan ban lyngshop jong kane ka jingpang, ha kaba la don ruh ki ri khamtam ki ri ka dewbah Europe, sa shisien kim banse ban hap ban pynjari biang ia ka jingkhangdam ha ki bynta ba kongsan ne ki jak aba juh ia ialum bha ki paidbah, khnang ban iada ia ka jingsaphriang ka jong ka, ha kaba ki lehkmen kum ia ka Christmas ne ka New Year, la mana bym bit ban ia lum bun briew palat, bad kum kine ki juh ki rukom jingpyrkhing, la pyntreikam ruh ha ki kato katne ki jylla ba don ha India, kum Delhi, Maharashtra, Karnataka, kiba long ki jylla, kiba la sdang ban wan ban mihpaw sa kawei pat ka jingpang ba la mih pawnyngkongna South Africa ‘OMICRON’.

Kine ki jingjia ki dang iai bteng ban iai pynsuhjier ia ka mynsiem ka jong u paidbah, ha kaba ka jingeh ba baroh ia takhuh ka long ba don na ki paidbah ki bym pat pdiang ne sngewthuh ia katta ka dor jong ka jingai ia ka tika iada (vaccination), namar don bun bun bah ki daw, kiba u briew um ngeit ne pdiang, hynrei ha kiba la kham sngewthuh, ki mih shakhmat ban ai ia ka tika, kaba long tang kane kawei na ki atiar kaba lah ban iada ialade bad ruh ia kiwei.

Haba phai sha la ka jong ka jylla pat, ka jingeh ka la iai ban ia u paidbah nong shong shnong, namar ka jingwan ban lyngshop jong kane ka jingpang, ha kaba ka la ktah shisha ia ka lad ban ia kamai ban ia kajih, ban ia trei ban ia ktah, ka la pynring sdot shisha ia ka lad kamai jakpoh, ha kaba lada sdang ban wad bad ban tih bniah, kiba bun na ki paidbah ba im bad minot ban trei ha la ki kam lajong, ki la shah ktah jur bha ha kine ki ar snem ka jingwan ban lyngshop jong kane ka jingpang, katno tam lei lei lada dei na ka jylla, kaba na lade kaba duna bha  ia katta ka bor ban pynmih pisa, kaba ia ki ba bun ki jingdonkam, la ap khmioh lynti katba  noh I synei  da ka sorkar kmie na Delhi.

Kumta u snem 2022, u paidbah u thrang bad u sliang ba nyngkong nyngshap eh, kane ka jingpang kan khuid hi phar na kane ka sla jong ka pyrthei, kyhnang ba ka lad ban ia khih ia ksar, ia kamai ia kajih kan long kumba ka juh long, pynban, na ki dak ki shin kumba ki mih paw, une u snem, un nym pat lah satia ban nud ban ong ba kane ka jingpang ka la sdang ba kan duh, hynrei na ki jingjia ha ki ar snem, u briew u la kham sngewthuh bad shemphang da kumno ba un iada ne ban phikir bad ban sumar dalade ialade, bad kaba donkam lei lei hi ka long ban iai bud ryngkhi ia ki kyndon jong ka tnat ka koit ka khiah.

Kumta ka jingwan u Snem Thymmai, ka juh don artad bad ka jingkyr,en ba kiei kiei baroh kin poi sha ka bha ka miat, bad kaba kham kongsan eh ka dei ka jingioh ia ka mat kaba koit kaba khiah, ha kaba dei kane shwa kaba lehse u briew u ia pan na U Blei Trai Kynrad, bad kyrmen skhem ba une u snem , un dei shisha u snem uban niad ia ki umat kiba kthang, uban pyndap ia ki sup ki thiar jong man la ki rympei iing, ba ka rep ka riang, ka kamai ka kajih ka trei ka ktah kan iaid beit kumba ka juh long, ha kaba baroh hi salonsar, yn ia ioh kein ia ka lad ban ia kamai jakpoh, kampher wat lada hap ban shah ia ka sngi, u slap, ka lyer, ka khriat, hynrei haba biang pat nadong shadong, kine ki jingeh baroh ki jah lut jar, haba ioh ban kheit pat ia u soh jong ka jingtrei shitom.