U Woh Kiang Nangbah u la iakhun ia ki shipai phareng da ka jingshlur ban iada ia la ka thymmei: ong u Lat

Syllad | The Rising MeghalayaDecember 31, 2024

U Lat ka Jylla u CH Vijayashankhar ha ka 30 tarik Nohprah u la iashim bynta ha ka jingrakhe kynmaw burom ia ka lyngkhuh sngi iap kaba 162 snem jong u Woh Kiang Nangbah u khla wait ka Ri uba la aiti la ka jong ka jingim ha ka jingiakhun pyrshah ia ki shipai ka sorkar Bilat da kaba leit buh syntiew ha u mot dur jong u ha ka jingialang ba la pynlong ha Jowai, West Jaintia Hills.

Haba ai jingkren ha kane ka prokram ba la pyniaid da ka Seinraij Jowai u Lat ka Jylla u la kdew ia ka jingshlur jong u Woh Kiang Nangbah uba la ieng ialeh pyrshah ia ki shipai ka sorkar Bilat khlem jingriej ha u snem 1862 bad uba la aiti ia la ka jong ka jingim ban iada ia la ka niam ka rukom ia ka kolshor ba kyrpang bad ia ki paid ka Ri Jaintia.

U la ban jur ruh ia ka jingdonkam ban kynmaw ia ka histori bad ban iada ia ki riti dustur na ka bynta ki pateng ban wan. U la pynpaw ia ka jingaiti jong ka Seinraij Jowai ban pynneh pynsah ia ka mariang, ka imlang sahlang, bad ban iada ia ki jaka kyntang bad ka koit ka khiah jong ka imlang sahlang, kaba dang iai bteng ban ai mynsiem ia ka imlang sahlang.

Ha kane ka sngi u Lat u la aiti ruh ia ka song pisa kaba T.1 lak 62 hajar sha ka Seinraij Jowai shibynta ka jingithuh ia ka jingshimkhia jong ka na ka bynta ban pynneh pynsah ia ka kolshor bad ia ka riti dustur jong ki jaidbynriew Pnar bad u la pyrto ruh ia ka jingitynnad bad ka jingkhuid ka jaka da kaba ai burom sha ki nongshong shnong kiba don ia ka jingkut jingmut ban pynneh pynsah ia ka mei mariang.

Ha kane ka sngi la wan iashim bynta lang ruh da kiba bun ki riew pawkhmat kaba kynthup ia u MLA ka Jowai u Bah Wailadmiki Shylla, Deputy Commissioner ka West Jaintia Hills District u Bah BS Sohliya, Superintendent of Police West Jaintia Hills u Chemphang Syrti, Dr. B.D.R. Tiwari, IAS. Commissioner & Secretary to the Governor, Dolloi Elaka Jowai u Puramon Kynjing, Seinraij President u HO Toi bad u General Secretary Arwat Sumer nalor kiwei kiwei pat.

Ha kajuh ka por ia kane ka sngi la rakhe ruh da ka Kiang Nangbah Iasiat Khnam Memorial Society (KNIKMS) ha Jowai bad Khliehriat, East Jaintia Hills, ha kaba ki dkhot na ki kynhun bapher bapher ki la wan ban leh burom ia une u khlaw wait ka Ri Jaintia.

Nalor kata u Lat u la leit jngoh ruh ia ka Mujra ka Mukan jong ka Kur Passah ha Thaw Thang Sati ha Chutwakhu Jowai ha kaba la pynlong ia ka jingialang kaba lyngkot, ha kaba ki riew rangbah jong ka kur ki la pynpaw ia ka jinglong tynrai jong ki na ka wah Kupli.

Ka Mujra ka Mukan ka dei ka jaka ba la buh ia ki shyieng jong kiba iap hadien ba la dep thang ia ki, hynrei ia kane ka rukom tynrai la khang da ka sorkar British, kynthup ia ka lehniam Behdienkhlam ha ki snem 1800.

U Lat ula iaroh ia ka jingtrei shitom ka jong ki ban pynneh pynsah ia ki jaka kyntang bad iaka riti dustur tynrai.

Ha ka jingkren u Lat ula pynpaw ia ka jingkongsan ban don ia ka jingiatylli, ka jingithuh lyngba ka kolshor bad ula iaroh ia ka Kur kaba la trei shitom kaba la kylla long ka nuksa ia kiwei pat ha ka imlang sahlang ban iada ia la ka jinglong kyrpang.