U Woh Kiri Dhar u dei ban ïoh ka nam Freedom Fighter: HANM

Syllad | The Rising MeghalayaFebruary 5, 2021

Ka Hynñiewtrep Achik National Movement (HANM) kaba la suit la shor ha u snem 2008 na ka bynta ban ïeng shakri ïaka daw bah jong ka ri bad ka jaitbynriew, ka la kynmaw burom ïaka lyngkhuh sngi ïap ba 159 snem jong u Woh Kiri Dhar Dolloi da kaba leit buh syntiew ha trai u motdur sah nam ba don ha Lummukut ha Shangpung Pohshnong.

Ïa u Woh Kiri Dhar la kha ha u snem 1823 ha shnong Shangpung bad ula shah siat ïap ha madan thma Loommukut Shangpung haka por ba u ïaleh thma pyrshah ïaka sorkar British haka 5 tarik Rymphang 1862.

Ha kane ka jingleit buh syntiew kaba la long mynta ka sngi Thodieng la lamkhmat da u President Rangbah jong ka HANM u Bah Lamphrang Kharbani haka jingïadonlang u MDC ka thaiñ u Bah J. Treilang Suchiang, u Waheh Shnong ka Shangpung Pohshnong u Bah Richardson Rabon bad u Bah Heibormi Sungoh na ka Seinraij Shangpung.

“Ha ka jingsngew jong nga ym don jingpher ba u Woh Kiri Dhar bad u Wickliffe Syiem kin ïoh kajuh ka burom kum kita ki riew ïaleh (freedom fighter) kumba ïoh u Woh Kiang Nangbah bad Tirot Singh Syiem,” ong u Bah Kharbani.

Ula ong kine ki khlawait ki la long shisha ka nuksa ïa baroh ki samla kiba don hapoh ka bri u hynniewtrep namar lyngba ki history ne ki khana shaphang jong ki, ki long shisha kiba ai mynsiem iaki samla ka ri.

Ha kane kajuh ka sngi hadien ka jingbuh syntiew ka HANM ka la pynskhem ïaka HANM Shangpung Circle bad pynbam smai ruh ïaki dkhot nongkitkam da u President Rangbah.

U Lamphrang Kharbani haba pynskhem ïaki dkhot nongkitkam ula pynsngew ba ka HANM kadei ka seng kaba ïeng ha ka nongrim ban ïada ïaki paradoh ki parasnam bad kum ka seng kan nym shong kli kti kan ïakhun pyrshah na ka bynta ka dawbah jong ka jaidbynriew.

Ula pynkynmaw ruh ïaki kam ba ka HANM ka la ïaid lynti, ha u snem 2009 ka HANM ka la rung sha Ïewduh bad Police Bazaar namar ka jingkiew dor palat jong ki mar bam mar dih kaba ktah shisha ïaka ïoh ka kot jong ki nongshong Shnong.

Ha u 2010 ka HANM ka la hiar sha Block-1 ban jynrat naphang ïaki mawput mawsam ïa kiba la wan siej da ka Assam bad ha u 2012 kadei ka HANM kaba nud ban leit wiang ding ïa ka Police Camp jong ka Assam kaba la wan shna beaiñ haka khyndew ka shyiap haka thaiñ Jirang kaba hap hapoh Ribhoi District.

Ha u 2019 ka HANM ka hair sha Ratacherra ban thung ïaki mawput ban wah ïaki signboard kum shi bynta ban ïada ïaka khyndew ka shyiap jong ka rilum Jaintia.

Ula ïathuh ba mynta pat ka kynti, ka HANM ka buh thong (target) sa ïaka Langpih, Psiar bad Khanduli khnang ba ka khyndew ka shyiap jong ka jaitbynriew kan nym ïoh ban rung wat tang shi inchi sha kiwei pat ki Jylla jong ka ri India.

Ula kyntu ïaki nongïalam ba thymmai jong ka seng ba kin treikam katkum ki riti treikam jong ka seng kata ban ïeng shakri na ka bynta ka daw bah ka jaidbynriew Khasi Pnar.

Kiwei de kiba la ai jingkren ki long u General Secretary u Bah Raiwan Sohtun, u Comly Lyngdoh President HANM West Jaintia, u Shaniah Suchen, u Working President Jaintia Zone u Pynshngaiñ Papang bad kiwei kiwei haka jingïalang kaba la pynïaid da u Chiborlang Suchiang President HANM Shangpung Circle.

Ki nongkitkam jong ka HANM Shangpung Circle ki long u President Chiborlang Suchiang, Vice President Niham Sungoh, General Secretary Teidaroiki Chen, Assistant Secretary Lakhon Ïakai, Publicity Secretary Damechwa Langwar, Sports Secretary Phrangbait Dhar bad kiwei kiwei.