U Wolbetstar Ramsiej & ka Kyntimon Marwein ki lahduh haka half marathon ka WJDSA

Syllad | The Rising MeghalayaOctober 1, 2022

Ka West Jaintia District Sports Association kum shi bynta ka jinglehkmen iaka Golden Jubilee (1972-2022) ka la pynlong iaka jingmareh Half Marathon haka sngi Saitjain haka jing ngai kaba 21.975 KM. Kane ka marathon kala sdang na Skhenpyrsit kaba hap haka hapoh ka Amlarem Sub Division bad pynkut ha Kiang Nangbah Stadium, Jowai.

Ha kane ka Half Marathon la wan iashim bynta kumba 172 ngut kynthup iaki shynrang bad kynthei. La wan ban iashimbynta da ki nongmareh naduh na West Bengal, sor Shillong, Mawkyrwat nalor ki nongmareh na ki district bapher bapher ka Jylla.

U Khroobok Passah District Sports Officer, West Jaintia Hills kum u kongsan ula kaweh iaka lama ban sdang ka jingmareh ha Skhenpyrsit haka jingiadonlang ki nongialam bad dkhot ka WJDSA

U Wolbetstar Ramsiej, Mawkyrwat ula long u lahduh na ki shynrang hadien bala ula lah ban pyndep iaka jingphet hapoh ka por kaba 1 kynta 8 minit 14 sekhon. Na ki kynthei pat ka Kyntimon Marwein na Mawkyrwat kaba pyndep iaka jingphet hapoh ka por kaba 1 kynta 26 minit 30 sekhon.

U Lahduh ba ar na ki shynrang udei u Ishwor Nepali na Shillong uba la pyndep iaka jingphet hapoh ka por kaba 1 kynta 9 minit 12 sekhon katba u Hary Bhakta Chetri, Shillong ula pyndep iaka jingphet hapoh ka por kaba 1 kynta 16 minit 18 sekhon.

Ka Shyamali Sing, West Bengal kaba la pyndep iaka jingphet hapoh 1 kynta 33minit 51 sekhon bad ka Phyrnai Kyndait, East Jaintia Hills kaba la pyndep iaka jingphet hapoh ka por kaba 1kynta 37minit 56 sekhon kila long ki lahduh ba bar bad lai na ki kynthei.

Ki nongjop kila ioh rah iaka song pisa T. 30 hajar, T.20 hajar bad 10 Hajar.

Ka kong B Blah Additional Deputy Commssioner kala long kum ka kongsan ban sam iaki khusnam sha ki nongjop ryngkat bad ki nongialam bad dkhot ka WJDSA.