Ud ki paidbah ba hap ban pynrung kyrteng Aadhaar ban ioh skhim shna iing PMAY

Syllad | The Rising MeghalayaJuly 2, 2020

Ki paidbah ha kylleng ki shnong kiba hap haka block Amlarem, Thadlaskein bad Laskein kila pynpaw ka jingbynniaw kaba khraw namar ba ki hap ban pynrung kyrteng ban ioh iaka skhim shna iing lyngba ka Pradhan Mantri Awas Yojana (PMAY).

Ha kine ki khyndiat sngi bun ki paidbah kila kyntait ban thep kyrteng ha ophis BDO Laskein, Thadlaskein bad Amlarem Block ban ioh ia kane ka skim shna iing hadien ba kila hap ban pynrung kyrteng Aadhaar ban ioh ai bad u Aadhaar number ha ka phorm ban ai sha ki BDO.

“Mynshuwa tang ka EPIC card ruh kala biang ban ioh ia kane ka skim shna iing, hynrei mynta pat ban ioh iaka skim PMAY ki paidbah kin hap ban ai bad u Aadhaar, kaba bun ki paidbah kim pat shon dur Aadhaar bad kane ka lah ban wanrah jingduh jingmyntoi ia ki ba duk ba suk ban ioh myntoi na kane ka skim,” la ong uwei u rangbah na ka thain Laskein uba la ong ruh dang bun ki paidbah kiba ym pdiang satia ia u Aadhaar.

Man ka sngi ki ophis Block kila dap da ki briew kiba shon Aadhaar. Don ki paidbah kiba shon dur Aadhaar bad don pat kiba la leit phai thylli khlem pyndap iaki phorm ban ioh skim PMAY.

Ka Khasi Students’ Union War Jaintia Circle mynta ka sngi hapoh ka jingialam u President Laitphar Syngkrem, General Secretary Lurman B Talang kila leit ai da ka dorkhat sha u Deputy Commissioner, West Jaintia Hills District halor kane ka jingpynrung kyrteng Aadhaar ban ioh iaka skim PMAY.

U DC ula ong ba ia kane u hap ban pynsngew sha ka sorkar la ka dei ka ban long salonsar ban ai Aadhaar ban ioh myntoi na kane ka skim.

Ka KSU kala pynkynmaw ba ia ka Aadhaar card ha Jylla ym pat pdiang ia u da ki paidbah salonsar bad ka iing bishar ba ha khlieh duh ka ri ruh kala pynmih iaka hukum ba u Aadhhar um dei ban long ka rukom bad ban pynrung kyrteng ban ioh iaki skim sorkar.

Ka KSU kala kyntu ruh ia ka Sorkar Jylla ba ka dei ban ai ka hukum ne ka jingpynbna kaba thikna halor ka Aadhaar card bad ym dei ban ban pynbor ban pynrung kyrteng Aadhaar iaki paidbah ban ioh jingmyntoi na ki skim sorkar.