Ujor ejahar ka Sorkar halor ka bamsap na ka projek surok ba T.2,300 klur

Syllad | The Rising MeghalayaOctober 22, 2024

Ka Sorkar Jylla ka la ujor da ka ejahar ban dawa tohkit halor ka jingkynnoh kam bamsap na ka projek shna surok Shillong-Nongstoin-Rongjeng-Tura kaba la mang ha ka jinglut kaba haduh T.2,300 klur.

Ha kane ka ejahar ba la mudui da u Chief Engineer (National Highway) PWD (Roads) u Bah AM Kharmawphlang ha ka 10 tarik u Nailur 2024 hapoh Shillong Sadar Police Station, kaba long ruh katkum ka jingbthah jong ka Sorkar Jylla. La ujor pyrshah ia ki khyndai ngut ki briew kaba kynthup ki ophisar jong ki artylli ki kompeni shimet na Telangana bad Haryana.

Kane ka projek surok ka dei kaba la mang palat T.2,300 klur tyngka. La mynjur ia kane ka projek ha u snem 2010 kum shi bynta jong ka Special Road Development Programme-North East jong ka Sorkar Pdeng.

“Namar kiba bun ki jingdkoh ha kaba pyntrei ia kane ka projek ka la pynlong ia ka Sorkar Jylla ba kan mudui da ka ejahar pyrshah ia kine ki heh ophisar bad kompeni khnang ban lap ia ki jingshisha baroh,” ong u kyrwoh.

Katkum ka ejahar la ong ba ka jinglut katkum ka jingiateh ha kaba sdang ka long T.1303.83 klur ha kaba la pynkylla bunsien bad la kyntiew sha ka T.2366.77 klur. Ka tarik ba la buh naduh ba sdang ban pyndep ia kane ka projek ka long ha u snem 2014.

“Ki heh engineer, ki ophisar ha ryngkat ka jingiasylla bad ki kontraktor ki la leh ia ki kam thok kam shukor da kaba leh thok ruh ha kaba iadei bad ki rekod na ka bynta ban leh ia ki kam bamsap bad wanrah ka jingduh nong kaba khraw ia ka pisa paidbah,” ong ka ejahar.

Na ka liang u heh pulit u la iathuh ba la register ia ka mukotduma bad ka jingtohkit ka dang iaid shakhmat.