Ujor ejahar kiba haïing uba shah siat iap ha ki BSF hajan Mawshun

Syllad | The Rising MeghalayaMay 6, 2023

Kiba haïing hasem jong u Bah Roning Nongkynrih uba shah siat iap ha ki shipai Border Security Force (BSF) hajan shnong Mawshun harum ka Pynursla ha ka miet sngi Thohdieng, kila mudui da ka ejahar ia u BSF ba donkti ban siat ïap ia u Bah Roning.

Ki pulit ki la shim ia ki jingtip na u para jong u ba la shah siat, uba don lang ha katei ka trok ha ka por ba la jia, bad ia ka jingjia la register ha Pynursla Police Station bad ka jingtohkit ka la iaid.

Na ka liang u Bah Erwin Sutnga uba la leit ban synran lang sha police station ia u para jong u Bah Roning, u la ong ba lada don ka jingsuba ba ka don ka jingleh bymman, ki BSF ki la dei ban pyntip beit sha ki pulit, hynrei kaba sngewlyngoh ka long ba kine ki BSF ki la shu siat dusmon khlem da tohkit ne kren eiei.

U Bah Erwin uba dei u ruh u nongsaid ain uba la paw, u la ong ba ki don ki kyndon jong ka aiñ haba la ujor ia ka ejahar, ka jingtohkit ruh kan iaid.

U la ong ba katkum ka jingshisha ba la pynpaw ha ka ejahar, ka pyni ba ka don ka jingleh donbor bad ia kane ka hap hapoh ki kyndon ain CrPC bad IPC kaba peit da ki pulit ka Jylla, bad ki pulit kidei ban leh ia kaba donkam. U la ong ba kane ka jingleh jong ki BSF ka pyni ba la pyndonkam bakla ia ka suloi ba la ai da ka Sorkar ban iada i aka ri, bad bynrap ba lada don ka jingpynkyllain ia kane ka kam un buddien ban pynthikna ba dei ban tian bishar ia kine ki briew da kaba tyngeh namar kim lah ban shu dkhat jubor ia ka jingim.

Pule shuh | Siat iap ki shipai BSF ia u nongniah trok ba suba shalan masi hajan ka shnong Pynursla

Na ka liang ka KSU South Central ka la pynrem jur ia kane ka jingjia bad ka la buh jingkylli kumno ki BSF ki lah ban wan iaid shaduh Pynursla, sha Lyngkyrdem, sha Wahlyngkhat wat ha ka jingshisha ki dei ban shong sha khappud.