Ujor ejahar longkmie iaki BSF ba wan thombor ia u kurim bad khun ha EJH, kyntait ki shipai iaka jingkynnoh

Syllad | The Rising MeghalayaJune 20, 2024

Ha kaba iadei bad ka jingjia wan thombor jong ki shipai BSF hapoh kawei ka longiing ha kawei ka shnong ha East Jaintia Hills kaba la wanrah ka jingmynsaw jur ia uwei u longkpa, na ka liang ka kurim jong une u rangbah haryngkat ki bor shnong ki la leit ban ujor da ka ejahar ha u In-Charge ka Umkiang Police Patrol Post.

Katkum ka jingujor ejahar ka Kong Martina ka la ong ba ha katei ka miet ha ka por kumba 11:30 laingut ki briew kiba la kam ba ki dei ki BSF bad ki bym shym la phong uniform ki la kyndang ia ka jingkhang iing bad rung jubor hapoh ka iingsah jong ka ha ka ha ka por ba ki dang ia bam ja baroh shi iing.

Ha kane ka por la ong ba u kurim jong ka longkmie u dang thet kti mar ia dep bam hadien ba kine ki briew ki la rung jubor shapoh iing  ki la thombor kynsan ia u. Ha kaba kum kane ka por ka la ong ba ma ka ha ryngkat ka khun kaba dang 15 snem ki la ia iam lyniar.

Ka la ong ba kine ki BSF ki la bteng ban thombor ia u kurim jong ka khlem da don kano kano ka daw ha kaba ki la shim ruh da u sdie na ka iing jong ki bad pyrshang ban thombor ia ki kumjuh da ka tari kaba ki wanrah. Ha kum kane ka por ka longkmie ka la ong ba ma ka bad ka khun ki la pyrshang ban knieh ia une u sdie bad ka tari na kine ki riew runar hynrei kim shym la lah.

“Ki la weng ia ka kti jong nga bad bteng ban thombor ia u kurim jong ka kat haduh ban da kdiah ki shyieng krung. Ngi la pyrshang ban pyllait ia u hynrei ngi la shah pynjem khnap bad hadien ba ki la thombor sa ia ngi ki la mih noh na ka ing jong ngi,” ong kane ka longkmie.

Hynrei hadien ka shiteng synia jong ka 20 tarik mynta u bnai ha ka por kumba 12:30 am  kine ki BSF ki la wan biang ha ryngkat ka kynhun jong kumba 15 ngut kiwei pat ki briew bad sdang ban thombor biang ia une u juh u briew haduh ba un da mynsaw jur Nalor kata ki la knieh ruh ia ka phone na ka khun jong ka bad ki la jrongkti ruh ia ka. Ka la ong ba ka pyrshang ban pyllait ia la ka jong ka khun na ki kti jong kine ki runar hynrei ki la kynjat ia ka na met bad kaba la pynlong ba kan ngat ha ka jingshitom. Ka la ong ba ki la bat jubor ruh na ka shyntur ka khun jong ka kat haduh ba kan da shitom.

“Kine ki briew ki la byrthen ruh ban siat ia ngi da ka suloi bad thew ruh da ki suloi hadien ba ngi la kyrpad ba kin ym siat. Hadien ba ki la mih noh ki la byrthen ia ka khun jong nga ba kin sa peitkai lada kan wan shapoh Umkiang,” ong ka ejahar ba la ujor da ka longkmie.

Ha kaba iadei bad kane ka jingjia ka don ruh ka video kaba khyndiat minit kaba pyni ia kane ka kam thombor ba la ring da uwei na ki nongshong shnong ka dei ka sakhi halor kane ka kam thombor jong kine ki runar.“Hadien Nga la ioh jingtip ba kine ki runar kiba wan thombor ki dei ki shipai BSF ia kiba ngam tip kyrteng hynrei Nga bad ka khun ngi lah ban pynithuh ia kine ki riew bymman.

Kumta ruh na ka liang kane ka longkmie ka kyntu jur ia kane ka tnat pulit ba kan rejister case pyrshah ia kine ki BSF kiba donkti ha kane ka kam thombor bad ban kem mardor bad pynshitom ia ki katkum ka ain.

Na kaliang ki shipai BSF kila kyntait mardor ia kane ka jingkynnoh bad kynnoh kylla ba ki nongshong shnong ka Kuliang ki khang lynti iaki haka jingpyrshang jongki ban khanglad iaka jingkhaii beain ha katei ka shnong.

U kyrwoh na u PRO BSF Meghalaya, ka ong ba ka don ka kynhun kaba 30-35 ngut ki nong Bangladesh kiba wan rung jubor sha u pud u sam ka India, lyngba katei ka shnong kaba ym pat dep ka jingker sainar shiah hapoh ka jingkhmih ka 172 bn BSF. Kine ki nong Bangladesh ki dei ban pdiang iaka shini kaba khaii beain na katei ka shnong.

Haba ioh jingtip ki BSF mar mar kila leit sha katei ka jaka, hynrei kine ki nongkhaii beain kila iohlad ban phet. Hynrei ha kum kane ka por ki nongshong shnong kila pyni bor iaki BSF bad kawang maw ruh iaki ryngkat ka jingkren iaki ktien khlem akor (kaba katkum ka video kaba saphriang ka jingkren iaki ktien khlem akor ka dei na baroh arliang).

La kynnoh ba ki dei ki kynthei kiba thombor iaki shipai da u sdie, kaba wanrah ka jingmynsaw ki shipai uwei na ka bynta ka kti, uwei pat u mynsaw naka jingshah kawang maw. Halor kane ka jingjia la ujor sha ki pulit Umkiang Police Patrolling Post, ong u kyrwoh na BSF.

La ong ruh ba kane ka shnong kaba hap ha Umkiang Police Patrolling Post ka dei ka shnong kaba jan bha bad ka khappud India Bangladesh bad ka jur bha ka khaii beain, khamtam ki nongshong shnong ki khaii beain iaka shini sha Bangladesh da kaba buh bun ka shini ha ki iing ki sem jong ki kaba hadien pat ki die beain sha Bangladesh.

Naduh u bnai Kyllalyngkot, ki BSF kila kurup haduh 100,000 kgs ka shini na kane ka shnong, haka jingkhang lad iaka kam khaii beain lyngba ki khappud India Bangladesh.