Ujor ejahar u Bah Ardent pyrshah ia u MDC barim ka NPP ba kynnoh bamsap

Syllad | The Rising MeghalayaApril 16, 2024

U President ka Voice of the People Party (VPP) uba dei ruh u MLA ka Nongkrem, u Bah  Ardent Miller Basaiawmoit haka 15 tarik Iaiong, u la ujor da ka ejahar pyrshah ia u nongialam ka NPP uba dei ruh u MDC barim u Bah Don Sumer halor ka jingkynnoh bamsap pyrshah ia u ha ka por ba u dang bat kum u Chief Executive Member (CEM) ka Khasi Hills Autonomous District Council (KHADC).

Ha kane ka ejahar ba la ujor sha u Officer In-charge ka Sadar Police Station, u Bah Ardent u la ong ba u Bah Sumer u la kynnoh ia u halor ka jingpyndonkam bakla ia ka pisa (funds) ha ka por ba u dang bat kum u CEM ka KHADC, kata ka jingkynnoh kaba don ruh ia ka video ka jingkren jong u ia kaba la pyllait lyngba ka news channel ha ka 13 tarik mynta u bnai.

Da kaba ong ba kane ka jingkynnoh bamsap pyrshah ia u ka long ka bym shisha bad ka bym don nongrim, une u nongialam ka VPP u la ong, “Kiba kum kine ki jingkren bad ki jingkynnoh pyrshah bym shisha ha ki rynsan paidbah pyrshah ia nga uba dei ruh u dkhot ka iingdorbar Meghalaya Legislative Assembly ka dei ka jingthmu ban pynjah burom lyngba ki jingkynnoh ki bym shisha bad kiba shu thaw hakhmat u paidbah.”

U la ong ruh ba kine ki jingkynnoh bym shisha ki dei ruh ki kam beain hapoh ki kyndon section 499 bad kiwei pat ki kyndon ain jong ka Indian Penal Code, 1860.

Kumta ha kaba iadei bad kane, ngi kyrpad jur ia phi ban shim ia ki lad jingpynshitom katkum ka ain, bad ba ia ki sakhi halor kine ki jingkynnoh ka shong ha u briew uba la pynmih ia kine ki jingkren, ong u nongialam ka VPP ha ka jingujor ejahar.