Ujor ka HYC Sohiong sha ka EE-PHE ba trei torti ia ka skhim sam um Jal Jeevan Mission ha Wahnongkseh

Syllad | The Rising MeghalayaAugust 2, 2024

Ka Seng Hynniewtrep Youths Council (HYC) Sohiong Circle ka la phah da ka jingujor sha ka Executive Engineer, Public Health Engineering, Electrical Division – Mawphlang Division ha kaba iadei bad ka jingpyntrei torti ia ka skhim sam um Jal Jeevan Mission sha ki thliew iing briew ha ka shnong Wahnongkseh.      

Kane ka la wan long hadien ba ka HYC ka la ïoh ia ka jingujor na ki paidbah nongshong shnong halor ka jingpyntrei ïa ka skim (Retrofitting Scheme for providing FHTC) ha ka shnong Wahnongkseh ka long kaba torti haduh katta katta. 

Kane ka jingtorti ka la paw ruh lyngba ka jingteh da ki pipe line kiba rit ki bym ïahap bad ka jingdon jong ki longïing kiba donkam ïa ka um. Ka jingteh da ki pipe ba rit ka long ruh ïa ki pipeline kiba pynïaid na Wahnongkseh sha ka dong Pyndeng Mawphlang kaba  don kham pajih na ka Wahnongkseh.

Hynrei kumba ka long, ha Pyndeng mawphlang ki don 11 tylli ki ïing bad kaba lah ban buh jingeh ïa ki nongshong shnong hadien habud. Ha ka jingshisha la ong ba sha ka dong Pyndeng mawphlang la kumno kumno la dei ban teh da u pipeline u bym duna ïa ka 40mm.              

Ka Seng ha u kyrwoh lyngba u Bah Purningstar Shabong President bad Hamarbamut Thabah Genl Secretary ki la ong ruh namar ka jingpyntrei torti, kiba bun ki pipe ki la dkut noh watla ha katei ka shnong ym pat lah ban sam um lyngba ki pipe ba pynteh thymmai na katei ka skhim. Kane ka jingdkut/lait noh jong ki pipe ka paw shai ïa ka jingpyntrei torti. Ka Seng ka la buh jingkylli ruh da kaba ong, “Kumno ngin mutdur ba ki pipe uba dei banneh da ki 10 haduh 15 snem hynrei tang hapoh 1 snem la bun kiba lait/dkut noh.”               

Ki paidbah ki la ujor da da kaba ong nalor ba ki dei ki pipeline kiba rit, hynrei ka la don ka jingteh shibun ki pipe supply kaba lah ban buh jingeh ïa ki paidbah na ka jingbym lah ban ïoh ïa ka um kaba biang katkum kaba la mang lyngba ka skhim Jal Jeevan Mission (JJM) jong ka Sorkar India.         

Ka Seng ka la ong ruh ba ka dong Pyndeng Mawphlang ka don kham pajih na ka Centre jong ka shnong Wahnongkseh bad ka don mynta 11 tylli ki longiing. Kumba la ïathuh da ki nongshong shnong, ka la don ka jingïakren ban shna top um la ka jong ha ka dong Pyndengmawphlang. Hynrei kaba sngewsih ka long ba ha kane ka dong ym shym la shna top um satia watla hapdeng ka jingteh da ki pipeline kiba rit bha. Nalor kine la sakhi ruh kiwei pat ki rukom pyntrei torti.

“Halor kine ki mat ba la kdew haneng na ka liang ka Seng ngi dawa ha khmat jong phi ba phin bthah ïa u Contractor ba un weng lut noh ïa kito ki pipeline kiba rit inshi kiba la pynïaid sha ka dong Pyndengmawphlang namar kitei ki pipeline kiba rit kim lah ban pyndap um haba ïanujor bad ka jingdon ki nong shnong shnong,” ong katei ka shithi.

“Ngi dawa ruh hakhmat jong phi ba phin btah ïa u Contractor ba un bujli lut da ki pipe kiba ïahap katkum ka jingdon ki longing kiba hap hapoh ka shnong Wahnongkseh kaba la pyntrei lyngba k tei ka skhim.

Ha kaba iadei bad ka jingbym treh jong u kontraktor ban trei jong ïa ka top um kaba heh (main reservoirs) ha ka shnong Laitnongkseh, ka Seng kiba bun ki pipeline bad ki pipe supply ha ka shnong Laitnongkseh la dep ban pyntrei naduh ka aïom tlang jong u snem 2023-24. Hynrei ki paidbah nong shong shnong haduh mynta kim pat ïoh ïa ka umbam na ka tyllong Wahsnoiñ. Ka daw kaba pynlong ïa kane ka jingbym pat ïoh um ha ka shnong Laitnongkseh ka dei namar ba u kontraktor uba la ai jingtrei na ka bynta ka main reservoir um treh ban trei wat haduh mynta ruh.

Ka HYC ka la ong ruh ba na ka liang ka Dorbar Shnong Laitnongkseh ka la ïakren, leit ud bad ai jingthoh sha ka ophis jong u SDO Sohiong Electrical Division, hynrei na ka liang ka ophis jong u SDO kam lah ban leh eiei bad ka ai pynban da ki daw ki bym shong nongrim haei haei ruh tang ban shah liang sha u kontraktor.

Ka Seng ka la ong ba ka la ïoh jingtip ruh na ki paidbah nongshong shnong jong ka Laitnongkseh ba u kontraktor uba pyntrei ïa kane ka dam u dei u briew uba pyrshah ïa ka tei ka project sam um ha ka shnong Laitnongkseh da kaba u khang wat ban shna ïa ka Dam bad ka Pump House ruh. Hynrei ka Dorbar shnong ka ïaid shakhmat ban shah ban pyntrei ïa katei ka project ha ka tei ka shnong. Kumta kumba la long mynta ka jingpyntrei ïa ka tei ka project sam umbam ha ka shnong Laitnongkseh lah dep kumba 95%.

Ka Seng ka buh ka jingkylli ia ka ophis ba ha kano ka rukom kam lah ban leh eiei halor kane ka jingbym trei jong u kontraktor watla ka Dorbar Shnong ka la leit ud la bun bun sien.

Kumta ka Seng ka dawa ba dei ban pynduh bad buh dak iong ne black remark noh ïa u kontraktor uba pyntrei ïa katei ka main reservoir khnang ba ka shnong kan ïoh ïa ka um kumba la mang da ka Sorkar.

Shuh shuh halor kitei ki jingdawa, ka Seng ka la ai por ba phin sngewbha ban pyndep noh hapoh ka ar taïew bad lada na ka liang ka ophis kam lah ban leh eiei na ka liang jong ka Seng kam banse ban shim da kawei pat ka sienjam.