Ujor ka JNC sha ka NHAI ba sniew tasam ka surok bah National Highway 6 ha East Jaintia Hills

Syllad | The Rising MeghalayaSeptember 7, 2021

Ka Jaintia National Council (JNC) hadien ba la ioh ia ka jingujor na ki paidbah halor ka jingsniew tasam ka surok bah National Highway 6, kala ujor sha u GM Cum Project Director, NHAI, PIU-Shillong Lower Lachumiere haka sngi ba Ar.

Ia kane ka jingujor ka JNC la ai lyngba u Deputy Commissioner, East Jaintia Hills Bah E Kharmalki.

“Ka jingsniew palat u surok NH-06 ka la pynshitom ia u paidbah ba bun ba lang ha ka ban leit ban wan sha ki kam ki jam jong ki, bad ka buh jingma ruh ia ki kali ba leit ba wan man la ka sngi, namar ka jingdon ki thliew ha kiba bun ki bynta jong u NH-06 bad lada ba ki nongngiah kali kin ñiah sted khlem poi pyrkhat kin lap iaki thliew ki syar hapdeng u surok NH-06 kaba lah ban wanrah iaka aksiden, bad ka lah ban buh wat ia jingim briew ha ka jingma kaba khraw namar kane ka jingsniew ka surok,” la ong ka JNC.

Ka JNC kala pynpaw iaka jinglyngngoh wat ka surok ha ka shnong Khliehriat kaba dei ruh ka Headquarter jong ka East Jaintia Hills ka surok u dang sniew, ha ka por ba slap ka surok ka shlei um bad haba shit ka suinbneng kine ki thliew ki syar ki pynmih pat sa iaka pum pum,

Ka JNC ha ka jingujor jong ka, ka la dawa na u GM cum Project Director NHAI ba ka dei ban maramot mardor iaka surok NH-06 kumba ka smat ka sting ban shim pisa na ki kali ha ki Toll Gate khnang ba kan long ka jingmyntoi ia ki paidbah bad ban shngain ka leit ka wan u paidbah.