Ujor ka JSU ba tei beain ki bar Jylla iaka jaka mane Blei ha ka shnong Lakroh, WJH

Syllad | The Rising MeghalayaOctober 22, 2024

Ka Seng Jaintia Students’ Union (JSU) ha ka 22 tarik u Risaw ka la dawa na ki bor pyniaid  District ka West Jaintia Hills bad JHADC ban shim da ki sienjam kiba tyngeh pyrshah ia ki bar jylla halor ka jingkynnoh tei beain ia ka jaka mane Blei hapoh ka shnong Lakroh, West Jaintia Hills.

Ha ka jingujor ba la phah sha u DC ka WJH, u president ka JSU Syndai Unit u Bah Pynshailang Suliang u la ong, “Ngi kyrpad ia ka jingtuklar lem ka jong phi ha kaba iadei bad ka jingkynnoh tei beain ia ka jaka mane Blei hapoh ka shnong Laitkroh. Kane ka jingtei ia kane ka jaka mane ka la wan long ruh khlem ka jingai jingmynjur da ki nongialam shnong bad committee shnong.”

Nalor kata u la pyntip ruh ba ha u bnai Lber mynta u snem, ka Village Committee bad u Rangbah Shnong ki la wan iakynduh ia ka Seng ha kaba iadei bad kane ka juh ka mat, kata da kaba pynpaw ba ki bar jylla kiba shong ba sah ha kane ka thain ki la pynieng jubor ia ki jaka mane Blei khlem da bud ia ki kyndon lane ioh jingbit na ki bor pyniaid shnong.

U la ong ruh ba kane ka jinglong jingman ka wanrah ruh ka jingsngewkhia halor ka jinglah ban mih ka jingiakynad na ka jingsngew iapher niam hapoh kane ka thain.

Kumta na ka liang ka Seng ka kyntu jur ia ki bor pyniaid District bad JHADC ba kin shimkhia mardor ha kaba iadei bad kane ka bynta khnang ban khanglad na kino kino ki jingjia kiba lah ban mih.

Ka Seng ka la ong ruh ba ka jingpynsangeh ia kiba kum kine ki jingtei kiba beain kan iarap ban pynneh ia ka shongsuk shongsain bad ka jingiaburom hapdeng ki kynhun nongshong shnong.