Ujor ka KSU sha u Dy.CM kynnoh pyndonkam bakla ki pulit ia ka bor ban kem ia ki trai muluk

Syllad | The Rising MeghalayaApril 17, 2024

Ka Khasi Students’ Union (KSU) ha ka 16 tarik Iaiong, ka la dawa ia ka jingtuklar jong u Symbud Myntri Rangbah ka Jylla uba khmih ia ka Tnat Home (Police) u Bah Prestone Tynsong halor ka jingkynnoh pyndonkam bakla jong ki bor pulit ka Laban Police Station bad ka tnat pulit ka Jylla ban kem khlem nongrim ia ki trai ri trai muluk.

Ha ka shithi sha utei u Myntri, u President ka KSU Laban Circle u samla Reuben Najiar u la kynnoh ba ka jingtreikam jong ki heh pulit hapoh Laban bad ka Tnat hi baroh kawei ka long kaba shah liang khamtam ha kaba iadei bad ki trai ri trai muluk kiba dei ki Khasi kiba ju ngat khah khah ha ka jingshah nion bein.

“Ka Seng ka kyntu ia phi ba phim shim ia ki sienjam kiba dei na ka bynta ban wanrah ka jingkylla ha ka Tnat pulit ha ka Jylla namar ka jingpyndonkam bakla jong ki heh pulit ia ka bor. Ban weng ia kane ka jingeh ka donkam ia ka jingshim khia jong ki bor sorkar, ki kynhun seng bad ki nongshong shnong hi baroh. Ki bor pulit ki dei ban bat ia ki kyndon jong ka ain, ban iada halor ki hok longbriew manbriew bad ban ai ka jingbishar hok ia baroh ki nongshong shnong,” u la ong.

Une u nongialam ka KSU u la maham ruh da kaba ong, “Ka Seng kan ym lah shah ia kiba kum kine ki kam leh donbor pyrshah ia ki nongshong shnong kiba dei ki trai ri trai muluk kumjuh ia ki dkhot jong ka seng, bad lada kin ki kam banbor kin dang iai bteng ka jingialeh markynti bad ka tnat pulit ka long kaba la thikna.”

U Najiar u la ong ba kane ka jingujor jong ka Seng ka la wan long ruh hadien ba ka la mih ka jingiakajia kaba malu mala hapdeng ki ar kynhun ki khynnah shynrang kiba dang ha ka rta hapdeng 16-20 snem kiba dei ki Khasi bad ki bym dei ki Khasi ha ki bynta jong ka Laban area namar ki kam aikylliang pisa bad ki kam. Kine ki dei ruh kiba ia ithuh ithaw bad iadei paralok hapdeng jong ki.

Hadien kane ka jingiakjia, ia kane ka mat la pynkut noh tang hapdeng jong ki hi bad baroh ki kynhun ki la leitphai noh sha la ki jong ki iing ki sem.

“Hynrei, kaba pynkyndit ka long ba ki heh pulit ka Laban PS ha la ka jong ka sienjam ki la leit sha ka iingsah jong uwei na ki khynnah ki bym dei Khasi bad kyntu ia u ba un wan shapoh police station bad hadien ki la pynbor ia u ba un ujor da ka ejahar pyrshah ia kawei pat ka kynhun ba dei ki Khasi. Une u khynnah um shym la kwah satia ban ujor namar ki iadei shi paralok, hynrei na ka liang ki pulit ki la pynbor ia u ba ujor. Hadien ha ka por janmiet, ki pulit ki la khot ia kitei ki khynnah Khasi ban wan shapoh police station, bad hadien ba ki la wan la kem noh ia ki. Wat hadien ba kiba haiing hasem bad ki dkhot jong ka Seng ki la bteng ban kylli halor ka jingshah kem ka jong ki, hynrei kine ki pulit ki la kyntait ban jubab bad ki la ong pynban ban leit kylli na u  Superintendent of Police ka EKH,” ong u president ka Seng.

Shuh shuh une u nongialam ka Seng u la ong ruh ba ka jingkem jong ki pulit ia ki arngut ki khynnah Khasi bad pynngat ha ki kyndon Laban PS Case No. 21 (04) of 2024 hapoh ki Section jingthmu kam pyniap, rahbor lane rahbor ban pyniap bad jingpynmynsaw nalor kiwei pat ki kyndon tang namar katei ka jingiakajia ba malu mala ka dei kaba hap ban pynrem jur da ka Seng.

Shuh shuh u la kynnoh ruh ha kiba bun ki khep ki bor pulit ki la leh ia ki kam thombor pyrshah ia ki nongshong shnong kiba dei ki trai ri trai muluk kaba pyni ia ki kam iashah liang jong ki.