Ujor ka RBYWO ba shah pynduh supply bam ki trai shnong ha kane ka Election

Syllad | The Rising MeghalayaMarch 25, 2024

Ka Seng Ri Bhoi Youth Welfare Organisation (RBYWO) ka la phah da ka jingujor sha u Deputy Commissioner ka Ri-Bhoi District halor ka jingshah pynduh ki supplier kiba dei ki trai shnong ban pynbiang ne supply bam sha ki nongpyniaid na ka bynta kane ka ilekshon Lok Sabha 2024.

Na ka liang ka Seng ka la phah ia kane ka jingujor hadien ba ki supplier kiba dei ki trai shnong ki la kynnoh ba ka Tnat pyniaid ilekshon ka la ai ia kane ka kam supply marbam tang sha uwei u briew uba dei na ka nongbah Shillong ban supply ia ka bam ka dih sha ki nongpyniaid ia kane ka ilekshon ka ban wan hapoh Ri-Bhoi District.

Ka Seng ha u kyrwoh lyngba u Bah Kenny Nongrum, General Secretary ka kynthoh jur ruh ia u Symbud Myntri Rangbah ka Jylla u Bah Prestone Tynsong uba la pynpaw ba ka Ri Bhoi District ka dei ka aspirational district, hynrei mynta pat shah nion shuh shuh bad tang ban supply ia ka bam ruh kim shym la ailad shuh na kane ka district. 

Ha kajuh ka por ka Seng ka la dawa ruh ba dei ban ai kam shwa ia ki trai shnong ne ki supplier kiba dei ki trai shnong ha kaba iadei bad ka jingsupply bam kumba la leh ia ka ilekshon MLA 2023.

Shuh shuh ka Seng ka pynpaw ruh ba kine ki supplier kiba dei ki trai shnong ki la iathuh ba kim pat shym la ioh satia wat ia ka jingsiew na ka bynta ka jingpynpoi bam na ka bynta kane ka ilekshon MLA kaba la dep.