Ujor ka VPP ia u nongialam ka NPP halor ka jingkynnoh pynthut ia ka jingialang ha Umsning

Syllad | The Rising MeghalayaApril 10, 2024

Ka Seng Voice of the People Party (VPP) haka 9 tarik Iaiong, ka la phah da ka jingujor sha u Chief Electoral Officer (CEO pyrshah ia u nongialam ka NPP uba dei ruh u CEM ka KHADC u Bah Pyniaid Sing Syiem halor ka jingkynnoh ia ka jingdonkti jong ka party ha kaba pynthut ia ka jingialang paidbah jong ka NPP kaba la long haka 8 tarik Iaiong ba la lah ha Umsning, Ri Bhoi District.

Ha ka jingujor u nongaiktien ka VPP u Bah Batskhem Myrboh u la ong, “Ka jingkynnoh jong u nongialam ka NPP u Bah Pyniaid Sing Syiem ba ki nongkyrshan jong ka VPP ki donkti ha kaba pynthut ia ka jingialang jong ka NPP ka dei ka bym don nongrim.                    

“Ka VPP ka dawa ruh ban pynshisha ia kane ka jingkynnoh ba kito kiba donkti ha kaba pyrta ‘ha u Prah’ ki dei ki dkhot jong ka party lane ki briew ba la pynshlur da ka party lane wat kiba shu noh liang sha ka party,” u la ong.

U Bah Myrboh u la ong ruh ba ka long kaba sngew bynniaw ba ka jingpyrta jong iwei arngut ki briew ki bym lah ban ithuh kan lam sha ka kam thombor bad lehbor, bad u dawa ba kito kiba donkti ha kane ka kam thombor ki dei ban shah pynngat ha ki kyndon jong ka ain.

“Ka jingpynpaw da ki nongialam ka NPP ka pyni tang ia ka jingleh kutlad bad ka jingbym lah ban tehlakam wat tang ia i kam iba rit eh. Kaei kaba kham i ma shuh shuh ka long halor ka hukum pyrshah ia ki heh pulit ba ki dei ban kem, kata khlem da iaid ia ki lynti jong ka ain, kata pyrshah ia ki riew paidbah kiba shu ia pyrta,” ong u nongialam ka VPP.

“Watla katta ngi kyntu jur ia kito kiba don mynsiem na ka bynta ka party ba kin shim ia ki sienjam ban kiar na kiba kum kine ki jingpyrta lada kan long ha kaba kum kane ka rukom khnang ban ym wanrah jingthut hapoh ka imlang sahlang.Ka jingpynphai kylliang kaba biang tam ka dei lyngba ka jingai ia ki vote,” u la bynrap.

Nalor kata une u nongialam ka VPP u la kyntu ruh na ka bynta ban long husiar halor kino kino ki jingpyrshang jong ki kynhun synrop ka MDA na ka bynta ban pynjah burom ia ka party khnang ban ioh ia ka vote sngewlem.

Ha ka jingujor ba la phah sha u Chief Electoral Officer (CEO), u election agent ka VPP u Bah Danny Langstieh u la ong, “Nga kwah ban pyntip sha phi halor ka jingkynnoh kaba khlem nongrim ba la pynmih da u nongialam ka NPP u Bah Pyniaid Sing Syiem ba ki briew ka VPP ki la pynthut ia ka jinglong jingman ha ka por ba pynlong ia ka jingialang jong ka seng NPP.”

“Ia kine ki jingkynnoh la pynmih da une u heh ka NPP ha ka 6 bad ka 8 tarik mynta u bnai ha ka por ba pynlong ia ka jingialap ilekshon na ka bynta ka party jong u ha Rynjah, East Khasi Hills bad ha Umsning, Ri Bhoi District.Kumta ngi kyntu jur ia ka ophis jong phi ba kan shim ia ki sienjam jong ka jingpynshitom katkum ki kyndon ain,” u la ong.

Kumjuh u la ong, “Ngi la ujor pyrshah ruh ha ka jingjrongkti bad kam thombor jong kito ki briew kiba don ha ka jingialang jong ka NPP pyrshah ia ki riew paidbah tang namar ka jingpyrta ia ka shap jong ka VPP.”