Ujor ki nongshong shnong ba trei torti ïa ka surok PMGSY ha Umphyrnai, hiar jurip u bah Lambor
Hadien ba u la ioh ia ka jingujor na ki riewrangbah ba ka jingpyntrei ia ka surok PMGSY ha ka shnong Umphyrnai ka ban pyniasoh sha ka shnong Jyntah, kam da long kaba janai, u Bah Lambor Malngiang, MLA/MDC ka Nongkrem, uba dei ruh u Chairman ka State Planning Board ka Sorkar Jylla haka sngi ba Ar u la hiar dalade ban jurip ia ka jingpyntrei ia kane ka surok.
Kane ka surok PMGSY kaba pyntrei ha Umphyrnai ka don 4.552 KM ka jingjngai ha ka jinglut ba la mang T. 2 klur tam bad la khmih lynti ba shen ia kane ka surok yn sa lah ban pyndep noh kloi.
Ha kane ka jingjurip u MLA ia kane ka surok PMGSY la ia synran lang ruh da u Rangbah Shnong, Bah John Kharkongngor lem bad ki dkhot jong ka Executive Committee ka Dorbar Shnong Umphyrnai.
Naduh ba wan ka jingkhang dam ym shym la lah shuh ban bteng ia ka jingtrei bad mynta la sdang biang ia kane ka surok bad ka long shisha ka jingkyrkhu ia ki paidbah. Hynrei hadien ka jingkhang dam ka surok kala jot ka la pra bad dap tang da ka pum pum suda.
Hadien ba la iaid shakhmat ia ka jingtrei na ka liang jong ki bor shnong kila pyntip sha u ba ka rukom trei kam da ibiang bad ynda u MLA u la wan hi ban jurip la sakhi ia ka jingdonkam ban maramot biang ia ka surok ba la dep siang rong.
“Nga la bthah ia ki nongtrei ban siang biang sa shisien ba kan ia wan dur lang kumjuh bad bun ki projek ha shnong Umphyrnai kiba bun kila jan dep lut bad ki kam ba dang sah ka long stang kumba shi kilometer” ong u Bah Lambor.
“Nga kwah ban pyntikna ba ki surok kiba dang sah hapoh ka shnong hi baroh kawei ba ngin ialeh ban pyndep kloi ia ki bad ruh ban ioh siang rong ia ka lynti ban leit sha ïing Dorbar bad ruh ban pyntikna ba ha ka shnong Umphyrnai baroh ki surok yn siang noh da ka rong” u la ong.
Na ka liang u Rangbah Shnong u la ong ba kane ka dei ka sien ba nyngkong ba yn iohi ia ka rong um ba kin siang rong. “Ngi la ia peit lang na ka bynta ka jingiaid beit jong ka kam bad sngewburom ia u MLA bad ia ki Engineer halor ka jingioh ia kane ka surok bad ka shnong kan ia trei lang ryngkat ryngkat bad ruh ban ia bud dien lang na ka bynta ka jingmyntoi jong ka shnong hi baroh kawei,” ula ong u Rangbah Shnong.
Facebook
Instagram
Youtube
Twitter
Ka jingpynshai halor ka jingujor b’ym sngewtynnad:-
1. Ia ka surok na Umphyrnai sha Jyntah hapoh ka PMGSY, la sangeh shipor na ka daw ka jingkhang dam ha u bnai March,2020 bad hadien ka jingslap jur haduh u bnai October,2020 kumba ki tip baroh. Ha u bnai November,2020,ka la don ka jingpynkhreh ia ki tiar siang kum ki maw, rong, etc. La sdang trei ia ka kam siang rong mynta u December haba la biang ki jingpynkhreh hadien ba ka ophis trei kam ka la phah trei.
2. Ia ka jingsiang ba la dep la dep pyndep ia ki quality tests baroh da ka department bad da u State Quality Monitor ha lynter ka surok bad la shem ba baroh ki tests ki long satisfactory.
3. Namar ba la ieh slem ba’n bteng ki kam siang na ki daw b’ym lah kiar ba la kew, ka surok ka la sdang mih maw hangne hangtai shuwa ba’n siang rong. Na ka Department, la batai ia u contractor ba u’n marmot lut ia ki bynta ba sniew baroh bad kane ka la trei kam shaid shaid katba ka kam siangrong ka dang iaid. La khlem siang torti khlem maramot bad ym donkam ba’n siang thymmai da kawei pat kat kum ka jingkhmih ba sani ka ophis trei kam,namar ka surok ka la khlem jot palat lait sa tang hangne hangtai ha kaba yn marmot beit ia ki jingb’ym biang katba ka jingsiangrong ka dang iaid.
3. Na ka liang ka ophis, ngi wan peit ia ka jingiaid beit ka jingtrei kat kum ki por ba donkam ba’n wan.
4. Ka long ka b’ym sngewtynnad ba’n kdew kti kulmar lane kynthoh khlem nongrim dano dano ia kiei kiei haba ka kam ka dang iaid shaphrang. Ngi donkam ka jingiatrei lang khnang ba kane ka surok ka’n dep ym ki jingmudui b’ym sngew shong nia,namar ka PMGSY ka don la ki rules shaphang kumno ba’n trei bad ngi’m lah trei kam kulmar kumba la mudui.
Khublei,
DPIU, PMGSY, EAST KHASI HILLS, SHILLONG.