Ujor u kyrtong VPP Jaiaw ia u Rangbah Shnong Mawdatbaki bym aijingbit pynlong jingialang ha Nongmali

Syllad | The Rising MeghalayaFebruary 6, 2025

U kyrtong ka Voice of the People Party (VPP) na Jaiaw constituency u Bah Denzil R Chen haka 5 tarik Rymphang u la ujor pyrshah ia u Rangbah Shnong ka Mawlai Mawdatbaki halor ka jingkynnoh ba u la kyntait ban aijingbit na ka bynta ban pynlong ia ka jingialang paidbah ha Mawlai-Nongmali ha ka 6 tarik Rymphang.

Ha ka shithi sha u District Election Officer (DEO), East Khasi Hills, u Bah Denzil u la kynnoh ba u Rangbah Shnong ka Mawlai Mawdatbaki u la kyntait ban aijingbit ia u na ka bynta ban pynlong ia ka jingialang paidbah ha ka 6 tarik Rymphang ha Nongmali katkum ka shithi kaba 5 tarik Rymphang.

“Kane ka dei beit beit ka jingpynkhein ia ka hukum ba la pynmih ha ka 30 tarik Kyllalyngkot da u Deputy Secretary ka Tnad District Council Affairs jong ka Sorkar Jylla,” u la ong.

“Namar kata nga kyrpad ia phi ba phin shim ia ki sienjam kiba donkam mynta hi ka janmiet lem kumta ngam banse ban shim ia ki sienjam ban leh ei ei mardor bad ban phah ia kane sha ki bor ba dei khmih ba kin pynbeit ia kane ka jingeh ka jong nga,” ong u Bah Denzil ha ka shithi sha u DEO.