Ujor u MDC ka BJP ia u kontraktor ba ai kaiphot thok halor ka jingpyntrei ia ka projek JJM

Syllad | The Rising MeghalayaAugust 5, 2024

U nongialam ka BJP uba dei ruh u MDC ka Tura u Bernard N Marak u la ujor da ka ejahar pyrshah ia u kontraktor halor ka jingkynnoh shukor bad leh thok ia ki nongshong shnong da kaba ai kaiphot thok sha ka Sorkar Pdeng ha ka jingpyntreikam ia ka ia ka projek sam um Jal Jeevan Mission (JJM) hapoh ka shnong Jebalgre.

Ha katei ka jingujor ejahar sha u SP ka West Garo Hills, u Bernard u la ong, “U Aiok M Sangma uba dei u paralok ba iajan jong u MLA barim ka Gambegre, u Saleng A Sangma u la ioh ban pyntrei ia ka projek JJM, hynrei khlem da pyntrei ia ka kam u la aiti ia ka kaiphod ba u la pyndep haduh 60% ka kam, hynrei ki shnong kiba hap ha kane ka projek kiba kynthup ia ka Jebalgre, Dikkimpara, Dopogre bad Dosagre kim pat shym la ioh satia ia ka um haduh mynta.

Nalor kata u la ong ruh ba ki nongshong shnong kim pat ioh satia ia ki kor um ha iing bad ka jingioh ia ka umbam umdih ka dang dei tang ka jingphohsniew kaba jngai bah na ka bynta jong ki. Une u kontraktor um shym la pyntrei ia ka kam hynrei pynban u la kam ba ka Jebalgre ka la dep haduh 100% ka jingpyniasoh lyngba ki pipe um, hynrei ka jingshisha pat ka long ba ym pat don ei ei ruh em.

Une u MDC u la kynnoh ruh da kaba ong ba U Aiok M Sangma u la kyntait ruh iaka jingbthah da ki heh ka tnad PHE ba un pynsted ia ka kam bad pyndep hapoh ka por ba la buh.

“Ki nongshong shnong kiba hap hapoh ka projek sam um ki la shah pynduh noh ia ka jingpynpoi umbam umdih kaba shngain namar ka jingleh bym suitniew jong une u kontraktor, kaba la pynlong ia nga ba ngan kyntu jur ia phi ban rejister mardor ia ka jingujor khnang ba kum kine ki jingjia kin ym jia shuh hadien habud.Kaba kham sngew bynniaw shuh shuh ka long halor ka jingshukor ba la dep haduh 100% ka jingpynpoi um sha ki thliew iingbriew ha Jabalgre,” u la ong.

“Nga kyntu jur ruh ban shim ia ki lad jingpynshitom pyrshah ia une u kontraktor hapoh ki kyndon ain khnang ba ki nongshong shnong kin ym shah shim kabu ha kino kino ki kontraktor. Une u kontraktor u la thok ym tang ia ki nongshong shnong hynrei ruh wat ia ka Sorkar Pdeng da kaba aiti da ka kaiphod kaba shu thok,” bynrap une u MDC.