Ujor u MLA ka VPP ia 10 ngut ki heh ka MeECL halor ka bamsap na ka Saubhagya Scheme

Syllad | The Rising MeghalayaJune 12, 2024

U MLA ka liang pyrshah Voice of the People Party (VPP) ka North Shillong u Bah Adelbert Nongrum ha ka 12 tarik Jylliew u la ai da ka jingujor hakhmat ka Meghalaya Lokayukta pyrshah ia ki shiphew ngut ki heh sorkar bad ka Tnat Meghalaya Energy Corporation Limited (MeECL) halor ka jingkynnoh bamsap na ka jingpyntrei ia ka skhim Saubhagya.

Kane ka jingujor ka long pyrshah ia u Chief Secretary barim, u Additional Chief Secretary barim (Power), Chairman cum Managing Director (CMD) ka MeECL bad ki heh ophisar barim ka MePDCL kaba kynthup ia u Director (Distribution), Chief Engineer (Distribution), Chief Engineer (Rural Electrification), Company Secretary, Chief Accounts Officer/Deputy Chief Accounts Officer, Additional Chief Engineer (Material Management) bad u Additional Chief Engineer (Planning & Design).

Ia kane ka jingujor la pynshong nongrim katkum na ka kaiphot jong ka Comptroller and Auditor General of India on Social and Economic Sectors jong u snem ba kut ha ka 31 tarik Lber 2022.

Ha ka jingujor u Bah Adelbert u la ong, “Ia kane ka jingmudui la leh hapoh ka kyndon u/s 13(1)(a) of the Prevention of Corruption Act, 1988, kata halor ka nongrim ba kine ki nongtrei sorkar ba la kdew ki dei kiba don ha ka kam ha katei ka por jong u snem 2018 kiba la pyndonkam bakla ia ka pisa ba l buh hapoh ka jingpyniaid ka jong ki kum ki shakri sorkar lane ailad ia kiwei pat ki briew ba kin leh.”

Nalor kata u la ong ba ka Chapter 3 jong ka CAG Report kaba iadei bad ka jinglap jingshem lyngba ka Audit halor ka jingtreikam jong ki State Public Sector Enterprises, bad ka para 3.3 jong ka kaiphot ka pyni halor ka jingshem ia ka jingpynlut kaba haduh T.156 klur ia kaba lah ban kiar hapoh ka MePDCL, kata ka jingshem kaba sngewkhia jur halor ka jingpyndonkam bakla ia ka pisa paidbah.

U Bah Adelbert u la ong ruh, “Wat hadien ka jingbthah ba la pynmih da u Cabinet Secretary, hynrei ka rai bym shong nongrim jong ka MePDCL ban ai kam hapoh ka Saubhagya sha ki kontraktor ha ka dor kaba ki buh ka la lam sha ka jingpynkut kaba lah ban kiar, kata kaba long haduh T.156.14 klur.”

Nalor kata u la ong ruh ba ka jingshem jong ka Audit ka pyni halor ka jingweng noh ia ki katto katne ki kyndon na ka bid document jong ki kam hapoh ka Saubhagya Household Electrification Programme da ka Empowered Committee (Tender) jong ka MePDCL kam dei satia tang halor ka jingleh bym hok bad iaid pyrshah ia ka jingbthah ba la ai da ka Rural Electrification Corporation on Standard Bid Document ba la ynmih da ka sorkar India, hynrei ka la pynioh nong ruh khlem nongrim ia ki kontraktor.

“Kane ka jingshem jong ka Audit ka pyni ba ka Empowered Committee (Tender) ka kynthup ia kine ki heh ophisar ka Tnat MePDCL. i) Director (Distribution) kum u Chairman, ii) Chief Engineer (Distribution), iii) Chief Engineer (RE), iv) Company Secretary, v) Chief Accounts Officer/Deputy Chief Accounts Officer, vi) Additional Chief Engineer (Material Management) vii) Addl. Chief Engineer (Planning & Design), ia kaba la thaw ha u bnai Risaw 2017 da ka MePDCL, bad kumta ia kine ki heh ka MePDCL la jer kyrteng katkum ka kyrdan kaba ki bat ha kane ka jingujor hakhmat ka Meghalaya Lokayukta” ong shuh shuh u MLA.