VPP: Dei ban pynshong nongrim halor ka jingdon paid ym ka jingsahdien iaka Reservation Policy

Syllad | The Rising MeghalayaOctober 6, 2024

Ka Liang pyrshah Voice of the People Party (VPP) ka la tyrwa ba dei ban pynthymmai ia ka State Reservation Policy da kaba pynshong nongrim katkum na ka jingdon paid bad ym na ka jingsahdien ha ka liang ka pule puthi.

U nongaiktien ka VPP u Bah Batskhem Myrboh haba kren sha ki lad pathai khubor hadien ka jingleit aijingmut sha ka Expert Committee halor ka State Reservation Policy kaba la kut noh ha ka 5 tarik u Risaw ha Shillong, da kaba ong ba ka Reservation Policy ha u snem 1972 kam shym la dei satia kaba la pynshong nongrim katkum na ka jingdon paid bad ka dei kaba khlem jingmut bad ka bym iahap satia.

U la ong ruh ba ka jingong ba ka Garo Hills ka dei kaba dang sahdien ha ka liang ka pule puthi bad kumta ka dei ban ioh ia ka bhah kaba kham heh ha thungkam thungkam kam long satia kaba iahap namar ka Jaintia Hills ka dei ka thain kaba dang kham sahdien haba ia nujor bad kiwei pat.

Une u nongialam ka VPP u la pynpaw ba ia kane ka policy ym dei ban pynshong nongrim halor ka jingsahdien, kata la kalong ha kano kano ka rukom ruh hynrei dei ban pynshong nongrim beit katkum ka jingdon paid, kata hapdeng ki Khasi-Jaintia bad Garo kumba la pynpaw ha ka para 1 jong ka 1972 Job Reservation Policy.