Wai paidbah u Kyrmen Shylla ya ka yiengkein lai kjat ha Tuber Kmaishnong

Syllad | The Rising MeghalayaFebruary 1, 2024

U Kyrmen Shylla, Montri Sorkar Jylla uwa man leh MLA ka thain Khliehriat haka 31 tarik Duiatra dawai paidbah u ya ka yiengkein lai kjat nae suspension bridge ha chnong Tuber Kmaishnong, East Jaintia Hills kawa da chna hajrong ka wah Myntdu hei thaw wa pynman ya ka Fish Sanctuary.

Kani ka yiengkein toh kawa da chna hei jrong wa 130 metre wei da pynkreh na ka MGNREGA iong u snem 2023-24, ka District Mineral Fund, PMKKKY wa ka MBDA hei dor wa 95 lak tyngka.

U Kyrmen Shylla hei klam chwa wow wai ya kani ka yiengkein da yaroh u ya ki yahkhmat ka chnong kiwa em mynsien u kreh neibynta i miat i bha wei roi i par ka chnong ka thaw.
Chooh chooh da ong u leh wa i ye u pyndep ya kani ka yiengkein u man i kyrkhu wa khroo ya ki bru wa rep kamjooh ya ki khon ka chnong ka thaw heiyatoh wa I kam uinke suwari.

U Micky Lyngdoh, Waheh Chnong Tuber Kmaishnong da ong u wa kani ka yiengkein toh kawa da angnood ki bru wa rep ka chnong ka thaw neibynta wow pynsuk ya ki hei por wa kit mar rep mar riang.

Ha kani ka sngi nalor kiwa chah khut sniawbha da emlang leh da u Abhilash Baranwal IAS, Deputy Commissioner, East Jaintia Hills, u Dr Tamiyaki Passah, BDO, Wapung C&RD Block Khliehriat, u G.Warjri, Additional Deputy Commissioner, East Jaintia Hills District, ka kong SD Shylla, Tourism Officer wa kiwi kiwa chah khut sniawbha nalor u Secretary Chnong ma T Phawa wa man kam u Chongknor iong ka yalang wai pynemburom wa da pynman ha madan Daicha, Tuber Kmaichnong.