Wai u Kyrmen Shylla ar tylli ki madan Futsal wa ka Parking Lot ha Khliehriat

Syllad | The Rising MeghalayaJanuary 23, 2024

Ha ka thong wow kyntu kynrong ya ka Football kat kam I yah ka juk ka por u Kyrmen Shylla, Montri ka Sorkar da wai paidbah ya ki ar tylli ki madan kynjat bol (Futsal Playground) ha Khliehriat East wa ka Khliehriat West haka 22 tarik Duiatra.

Da em lang u Abhilash Baranwal, Deputy Commisioner, East Jaintia Hills District, u Finelyness Bareh,  MDC –JHADC, ki Waheh Chnong wa ki dkhot ka Khliehrait West Sports Club.

Ya I pynlut pynsep hei wow chna ya kani ka madan kynjat bol (Futsal Playground) da yarap poisa na ka District Mineral Foundation Fund (DMF), East Jaintia Hills District.

U Kyrmen Shylla hei klam iong-o kam u kongsan yaroh ya kiwa da leh yei kam wabha hei wow kyntu kynrong ya ki khon khynroo khyllood ka thain kiwa em sap ha ka ya kynjat bol.

Chooh chooh khana u leh wa ya kam kini ki jait madan dabooh thong u chna hadooh 5 tylli ha kani ka wat wa nyngkong heiwa 2 tylli toh kini ki da chna ha Khliehriat East wa Khliehriat West katwa ya ki 3 tylli wan wa dang sah daw chong pyrkhat.

Heiyatoh wa ka madan football ha Khliehriat da mang bhah u na ka MLA Scheme iong-o 5 lak wow ker kynroh yaka madan bol Khliehriat West.

U Abhilash Baranwal, Deputy Commisioner, East Jaintia Hills District hei e kyntien kam u khlieh ka District da khut kyrsu kyntu u ya ki paidbah ka thain Khliehriat wow yakrehlang hei wow pynmiat pynbha ya kani ka madan wei kyrmen yooluti u leh wa I em iong kani ka Futsal Playground u nangmih chooh kitae ki khynroo wa em sap kiwa ye u rah nam rah burom ya ka District wa ka Jylla ha ki por ki sngi wa chakhmat.

Ha kane ka sngi da wai paidbah leh yaka parking ha Khliehriat East da ka sakhi lang ka kong Santa Mary Shylla, MLA Sutnga Saiupung. Ka Kong Santa hei klam iong ka da ong ko kani toh kawi na ki sngi wow sahkhanatang sahkynmoo ya ki bru ka thain Khliehriat heiwa da ioh u wai paidbah ya ka Futsal Playground wa ka Village Parking Lot kiwa man ki jingchna wa dawa bha ya ki bru ka thain Khliehriat East.

Heijooh I por leh khut ko ya ki paidbah wow yakrehlang hei wow pynmiat pynbha ya kini ki jingchna deitae I sniaw mantre kam ki nongchnong chnong kiwa em ka jingkitkhlieh yei miat I bha ka imlang sahlang iong ka chnong ka thaw.