Wan buh mawnongrim u Bah Prestone 7 tylli shisien buh ban pynjlih iaki surok ha Jowai bad ki shnong ba marjan

Syllad | The Rising MeghalayaDecember 8, 2022

U Deputy Chief Minister ka Jylla u Bah Prestone Tynsong ula wan buh bad plie iaki 7 tylli ki maw nongrim shisyndon haka juh ka sngi na ka bynta ban shna bad pynbha pynjlih iaki surok bad jingkieng ha Jowai bad ki shnong ba marjan kiba hap hapoh ka Jowai Constituency.

Kane ka jingbuh mawnongrim 7 tylli shisien plie ka dei kaba ym ju jia koit bad ka lah ban dei ka rekod haka history jong ka tnad PWD. Ia kane ka jingialang buh mawnongrim la pynlong ha Mihmyntdu.

U kongsan Bah Prestone Tynsong ula ong ba kane ka jingbuh ia une mawnongrim u sakhi pateng la pateng iaka Jowai constituency bad ka sor Jowai. Ula ong ba kane ka jia long ka dei na ka jingtreishitom u Wailadmiki Shylla MLA Jowai uba la shimkhia ban pynioh iaka roi ka par ka Jowai Constituency.

Kine ki maw nongrim kiba ula wan plie ki dei na ka bynta ban pynbha bad pynjyllih iaki surok ka shnong Jowai lyngba ka World Bank MITP na ka bynta 33 KM ha ka dor T.28 klur.

Ka surok shnong ha Niriang yn shna haka dor T. 1, 20, 87, 000/-, Sabahmuswang T. 2 klur, Mihmyntdu kaba la iaid shait T.5 klur lyngba ka RIDF XXVII, katba ka jingiada iaka surok da kaba shna iaki nala, ki kynroh na Madan Thadlaskein sha Mission Aitnar haduh Mutong haka dor T. 2, 13, 50,000/-

Iaka jingkieng ha ka surok ban pyniasoh iaka Kiang Nangbah Road bad ka surok Thomas Jones Synod College haka dor T.80 lak bad ka surok Demthring-Sohmynting- Moodymmai haka dor T.45 klur

Baroh kine ki jingtei kala kot haduh 84 klur, 14 lakh 37 hajar tyngka.

Ha kane ka jingwan plie bad buh mawnongrim nalor u Bah Prestone Tynsong uba long kum u kongsan la iadonlang u Myntri Pynroi Sor, Tourism, GAD  ka sorkar Jylla ma Sniawbhlang Dhar, u MLA Jowai ma Wailadmiki Shylla, u ma Thombor Shiwat CEM JHADC nalor kiwei kiwei ki MDC.

Iaka jingialang la pyniaid da u Superintending Engineer PWD (Roads), Jowai Circle Bah BW Phira.