Wan hiar ka RDA sha ka thain Amlarem ban pan jingkyrshan ia u Robertjune Kharjahrin

Syllad | The Rising MeghalayaMarch 15, 2024

Ka kynhun jong ka Regional Democratic Alliance (RDA) , ka UDP bad ka HSPDP kala hiar sha ka thain Amlarem Constituency ban pynlong iaka jingialang paidbah ban pan ka jinghkyrshan na ka bynta u kyrtong monlang u ban iakhun iaka elekshon haka lama jong ka UDP, u bah Robertjune Kharjahrin haka 13 tarik Lber.

Kane ka jingialap kala sdang na Iew Bakur, Dawki, pynbud pat ha Nongtalang, Umladkhur bad Demthring. La iadonlang ki nongialam ka party UDP bad HSPDP naduh u bah Metbah Lyngdoh, PK Pangniang, u MLA Amlarem ma Lahkmen Rymbui, u Bah Robertjune Kharjahrin nalor kiwei kiwei.

U Bah Lahkmen Rymbui haka jingkren lamkhmat, ula ong kane ka por kadei ka por jong ka jingtynjuh bad hapoh ka ri India la sakhi iaki aiñ ba laiphew jait, don ki ain kiba pynmyntoi bad don ruh ki ktah iaki longdien mandien.

Kumta, ula ong ba donkam ban ioh ia u nongmihkhmat uba shemphang uba lah ban iakren bad ka sorkar hapoh Delhi ban pynjem iaki aiñ na ka bynta ka bha ka miat ka roi ka par jong ka jylla bad ka jaitbynriew.

U Robertjune Kharjahrin kum u kyrtong na ka Shillong Parliamentary Seat, ula pynsngew iaki mat iakhun elekshon jong u, kata ban iada ia ka Ri bad ka Jaidbynriew na ka jingwan rung kyrthep jong ki mynder ri hapoh ka ri, ban pynneh pynsah iaka snap jinglong ba kyrpang jong ka Riti ka dustur uba rim ba jah bad ka jingmane Blei laitluid.

Ha kaba iadei bad ka CAA, ula ong ba kadei kawei na ki jingma kaba ap iaka ri namar ba ia kane ka aiñ ym shym la pyllait pura haki jaka riewlum ha ki katto katne ki bynta watla pyllait iaka jingtreikam jong ka ha Jylla. “Ha ka kyndon aiñ ka CAA kaba la pyllait dangshen la kdew ba ha ki jaka ba treikam ka ILP ka CAA kan ym treikam, kumta ngi ieng ba lada maphi kum ki nongshong phi jied ia nga bad ka kynhun RDA ngin leit ban tied miej haka sorkar India ban dawa iaka ILP kumba ailang ia kiwei ki Jylla haka thain shathei lam mihngi jong ka ri,” la ong u Bah Robertjune.

U Bah Robert ula ong ruh 15 snem ngi la kyrshan ia u MP Vincent Pala hynrei ym shym la lah ban wanrah ioh u soh uba thiang. Ula ong ba ka por ka dei eh ban bujli nong ia u nongmihkhmat bad ula pan iaka jingkyrshan u paidbah ban jied ia u bad ka kynhun RDA ba un shimkhia ban iasaid iaka eh ka shon jong ka Jylla.