Wan hiar tohkit ka Crime Scene Unit, lashai yn pyndep iaka Post Mortem ka khynnah skul ba suba shah pyniap

Syllad | The Rising MeghalayaMarch 14, 2021

Ka kynhun jong ka Crime Scene Unit (CSU), Shillong haka Sngi U Blei kala wan hiar sha ka Ar kilo ban tohkit iaka jingjia suba shah pyniap ka khynnah skul ha East Jaintia Hills District.

Ka CSU ha ryngkat ka jingiadonlang ki pulit jong ka Khliehriat Police Station kila pynlong iaka jingtohkit ha katei ka khlaw kaba jia ka jingsuba shah pyniap kane ka khynnah kaba 17 snem ka rta.

Hadien bala pyndep iaka jingtohkit ha katei ka jaka la rah iaka met sha Khliehriat CHC ban pyndep iaka post mortem lashai ka sngi Nyngkong.

Kane ka khynnah kala jah naduh ka sngi Thohdieng (12/3/21) bad la lap iaka met iap jong haka sngi Saitjain (13/3/21). Kane ka khynnah kala leit skul haka sngi Thohdieng, hynrei tad haduh ka por 6 baje janmiet kam shym la wanphai ïing bad la wad paidbah iaka hapoh shnong poh thaw bad ban kylli pyrthew na ki paralok jong ka bad na skul.

Baroh shimiet la ieh ia ka met jong ka ha khlaw Ar kilo, ka jaka kaba la tip kum ka Wah Umbluh Wai Khyrmi, ka jaka kaba hap hapoh u pud u ang ka Dkhiah East  khnang ba ka kynhun CSU kan ioh ban pyndep iaka jingtohkit bad ka jingdonkam jong ka aiñ.

Kiba haiing kane ka khynnah kila dep ban mudui iaka jingujor ejahar haka juh ka miet bad kila dawa na ka bor ka aiñ tohkit bniah bad ban pynshitom iaki runar kiba donkti ha kane ka kam katkum ki kyndon jong ka aiñ. Katkum ka jingmudui ejahar ki suba jur ba ia kane ka kam la leh da ki briew kiba ithuh ne kiba iajan bad ka.

Tuid ki jingpynrem na ki sengbhalang:

Ka Jaintia Students’ Movement (JSM) hadien bala jia khah khah kine ki kam pyniap ia ki kynthei khynnah hapoh ka District kala dawa naka sorkar ban buh noh da ka tnad Forensic Science Laboratory khnang ban pynsted iaka jingtohkit ki Pulit.

Kala pynrem ruh ia jingshah pyniap ki kynthei khynnah ha ki runar, kiba la duh iaka mynsiem briew bad dawa na ka bor jong ka aiñ ban thwet bad ban pynshitom iaki runar katkum ki kyndon jong ka aiñ.

Suba shah pyniap sa kawei ka khynnah skul ha East Jaintia Hills

Shuh shuh u Wellson Siangshai, u dkhot jong ka JSM, ula ong ba wat ka case jong kawei ka khynnah kaba shah pyniap bad suba shah lehbeijot ha kane ka hi ka District ha kine ki lai bnai bala dep, ki pulit haduh mynta kim pat iohkem iano iano.

“Ka jingtlot jong ka bor jong ka aiñ kadei ruh kawei kaba pynshlur iaki runar ban shlur ban leh iaki kam sniew ha kane ka district,” la ong u Wellson.

Ka Hynniewtrep Youths’ Council (HYC), East Jaintia Circle bad ka Jaintia Youth Federation (JYF), Jaintia National Council (JNC), ka Khasi Students’ Union Wapung Unit kila pynrem jur ia kane ka jingsuba shah pyniap kane ka khynnah skul.

Baroh kine ki seng kila dawa na ka tnad Pulit ban thwet jur iaki runar kiba suba donkti ban kem mardor bad ban pynshitom katkum ki kyndon jong ka aiñ bad ban ai ka jingbishar kaba hok.