Wan iakynduh u District Governor iaki nongkitkam bad dkhot ba thymmai ka Rotary Club Jowai

Syllad | The Rising MeghalayaNovember 5, 2023

Ka Rotary Club Jowai haka 4 tarik Naiwieng ka la pynlong ka jingiakynduh lang haka jingdonlang u Rtn. Nilesh Kumar Agarwal, District Governor RID-3240 haka jingialang kaba la long Infinity Conference Hall, Mooralong.

Ha kane ka jingiakynduh lang u Rtn D.F. Majaw (PHF) ula long kum u Master of ceremony bad ka ioh ki kyntien pdiang burom na u Rtn. Rudolf E.Laloo (PHF) RC-Jowai, ki kyntien ai mynsiem na u District Asst. Governor nalor kiwei kiwei.

U Rtn. Deibormi Toi, President Rotary Club Jowai ula iathuh iaka thong treikam jong ka Rotary International kiba shong pyrkhat sani bha da ki riew pyrkhat jong ka Rotary International kynthup ia ka Community Service, Environment, Education, Health, Sanitation bad kiwei kiwei kiba iadei bad ka bha ka miat ka imlang sahlang jong ki briew bad nongshong shnong.

U Rtn. Nilesh Kumar Agarwal, District Governor, RID -3240 kum u kongsan haka jingkren u pynpaw ka jingsngew nguh sngew burom iaka Rotary Club Jowai bad ula kyntu iaki dkhot ban don ka mynsiem iatreilang bad sngewtrai iaka seng khnang ban lah ban leh shibun ki kam na bynta ka imlang sahlang kynthup naduh ban kyntiew iaka pule pule, ka jingkoit jingkhiah, ka jingiada pynneh pynsah iaki sawdong sawkun ka mei mariang nalor kiwei.

Shuh shuh ula ong ka jingpynlong iaki jingialang pyrkhat na ki por sha ki por kadei kaba donkam bha bad ka jingiashim bynta haki prokram bapher bapher jong ka Rotary Club ha kiwei ki jaka ka iarap ban tip bad shemphang ban trei iaki kam katkum ka jingdawa ka juk ka por.