Wan iashim bynta palat 1500 ngut ha ka iakob mareh Swachhata Run ha Raj Bhavan

Syllad | The Rising MeghalayaOctober 3, 2024

Ka Raj Bhavan Shillong ha ka 2 tarik Risaw ka la sakhi ia ka jingwan tuid ki paidbah naduh ka por 5 baje mynstep hadien ba ki nongmareh thong kiba ha ki rta bapher bapher ki la wan ban register ia lade ban iashim bynta ha ka 5.5 km Swachhata Run kaba hap hapoh jong ka Swachhata Hi Seva shibynta ban rakhe ia ka lyngkhuh sngikha u Mahatma Gandhi.

Ki la don haduh palat 1500 ngut kiba la wan iashim bynta ha kane ka Swachhata Run ba la khot pynlong da ka Raj Bhavan bad ka Central Bureau of Communication (CBC) Shillong ryngkat ka jingiatreilang abd ka District Sports Office, East Khasi Hills.

Ia kane ka jingiakop mareh la sdang da ka jingkaweh lama da u Lat ka Jylla u CH Vijayashankar ha kaba u la ong ba ka jingthmu jong ka jingiakob ka long ban pynsngewthuh sha ki paidbah ban kyntiew ia ka Swachhata Hi Seva hapdeng ki paidbah ha kaba u la pyrto ruh ia kane ka jingwan iashim bynta shitrhem jong ki paidbah wat hapdeng jong u slap ba jur.

Kane ka 5.5-km Swachhata Run ka la sdang na Raj Bhavan lyngba ka St. Anthony’s College, Shillong College, St. Mary’s College, Don Bosco Square, Laitumkhrah Market, Fire Brigade, St. Edmund’s School, Malki Point, Barik Point, Civil Hospital, Main Secretariat, DC Office bad pynkut biang ha Bhavan.

Ha ka Open Category (Men) u Bah Daniel L Walang ula wan ha ka kyrdan kaba nyngkong,  u Nahtei Wangnao bad u Dasaman Khyndait ki la jop ha ka kyrdan kaba ar bad balai. Ha ka Open Category (Women) ka Marqueenless Ramsiej ka la wan ha ka kyrdan kaba nyngkong, bud sa ka kong Phyrnai Khyndait ha ka kyrdan ba ar bad ka kong Dapliss Wahlang ha ka kyrdan ba lai. 

U Daniel u la pyndep ia ka jingmareh da 17.15 minit katba ka kong Marqueenless ka la pyndep ha ka 22.25 minit. Hadien la sap ruh ia ki khusnam sha kito ki nongjop ha kane ka jingiamareh shynrang kynthei kiba la palat ia ka 50 snem rta.

Hadien kane la pynbud da ka prokram thung tynrai dieng hapoh ka lama jong ka Ek Ped Maa Ke Naam, ha kaba u Lat ka Jylla u la thung ia u dieng ha Nanpolok (Ward’s Lake) bad ha phyllaw ka Raj Bhavan. Kane ka Campaign kaba la pynlong ha ka ri baroh kawei kadei da ka jingthmu ban iada iaka mariang.

Hadien ha ka jingrakhe ia ka Gandhi Jayanti ha Durbar Hall, u Lat u la leit buh syntiew ban kynmaw burom ia u Mahatma Gandhi bad u Lal Bahadur Shatri ha ka lyngkhuh sngi kha jong ki. U Lat ula aiti ruh ia ka cheque kaba mar T.1, 11,000 sha ki 4 tylli ki Gandhi Kendras kiba kynthup ia ka Laitkroh Kasturba Gram Seva Kendra, Tuber Kasturba Gram Seva Kendra, Jambal Kasturba Gram Seva Kendra bad Magupara Kasturba Gram Seva Kendra.

Nalor kata u Lat ula sam ruh ia ki khusnam sha ki nongjop ha ka jingiakop thoh Essay Writing bad Art Competitions ba ba pynlong da ka CBC Shillong, National Book Trust of India (NBT) bad ka ophis District Education halor ka phang Swachhata bad Poshan na ka bynta ki khynnah skul jong ka East Khasi Hills.

U Lat u la pyllait ruh ia ka Mobile Library jong ka National Book Trust na ka phyllaw jong ka Raj Bhavan, katba ka National Institute of Fashion Technology (NIFT) Shillong bad ka Tnad Sericulture ki la pyninam ia ki jingthain kti ia ki tiar thain bad ia ki jain Khadi.

Ha kane ka prokram kaba shi sngi kynthih la wan iashim bynta lang ruh da u Myntri ka Tnad Animal Husbandry and Veterinary u Bah AL Hek lem bad kiwei pat ki heh ophisar na ki Tnad ka sorkar Pdeng bad sorkar Jylla.