Wan iasyllok u Kamki Diengdoh bad ka Jessie Lyngdoh iaka lynti iaid haka jingim bad ka sap ka phong ha Khliehriat

Syllad | The Rising MeghalayaSeptember 7, 2024

Ban pynshlur iaki khynnah bad samla pule ka East Jaintia Hills District ban phai khmat sha ka line pule Mass Media kum kawei na ka lad ioh kam ioh jam bad ban jop haka jingim, ka Khliehriat Higher Secondary School, Alumni shibynta ka jinglehkmen Golden Jubilee, haka 6 tarik Nailur kala pynlong da ka Career Guidance halor ka phang ‘‘Next Gen Media: Shaping Tomorrow’s Storytellers”.

Ha kane ka jingiasyllok ne career guidance la wan simbynta da u nongshna phlim ba paw ha kine ki khyndiat snem, u Bah Kamki Diengdoh; ka samla Jessie Lyngdoh kaba dei ka nongthaw jingrwai bad nongrwai; bad u Bah Ferdinand Rani u wei na ki content creator ka jylla.

U Bah Kamki bad ka samla Jessie kiba la pyndep iaka jingpule Mass Media; kila iathuh iaki khynnah skul jong ki 18 tylli ki skul na Khliehriat halor ka jingmyntoi ka line pule Mass Media ia kiba don ka sap ka phong ban iathuh ruh iaki khana da kaba thoh ne da kaba shna iaki phlim, ki sur jingrwai.

Kine ki lai ngut, kila pynsngew iaki khynnah skul iaka jingshem bad ki lad jingtip shaphang ka rukom shna phlim, thoh jingiathuh khana nalor kiwei ha kaba ki khynnah skul ruh, shynrang bad kynthei kila shim bynta shongshit ha ka ban kylli jingkylli bad twad jingmut halor ka jingiaid lynti haduh ba kin pawnam.

Haba kyntu pat iaki khynnah skul halor ka jingktah jong ki rynsan social media, u Bah Kamki Diengdoh ula ong “Ki rynsan social media ki lah ban pynwan dur iaka jingim ka jong phi bad ha kajuh ka por ki lah ruh ban pynjot iaka jingim ka jong phi, phi don ka tiar kaba khlaiñ bor (Mobile Phone) haki kti ki jong phi bad pyrkhat arsien shwa ban uplaod ia kino kino kiba phi jied ban post haki rynsan social media”.

Ka President jong ka KHSS Alumni Kong Simi Khongthiang kala ong ka jingpynlong ia kane ka Career Guidance ka long ba ki samla pule ka District ki dang duna ka jingtip jingshemphang halor kane ka phang bad ka khmih lynti ba lyngba kane ka prokram ki khynnah kin ioh jingshai shaphang ki lad ki lynti bad ki jingmyntoi jong ka kam haka Mass Media.

La plie ia kane ka Career Guidance da u kongsan Ma Permi Dkhar Chartered Accountant, haka jingdonlang u symbud kongsan Ma Demetrius Nongtdu Assistant Executive Engineer PWD Roads, u Principal KHSS Brother Solomon Swer, ki nonghikai nalor kiwei kiwei.