Wan jied ka MSOA bad sports association iaki jaka ialehkai ban pynkhreh iaka Meghalaya Games ha Jowai-Wahiajer

Syllad | The Rising MeghalayaJune 12, 2024

Ban pynkhreh ia ka lympung ialehkai sports 6th Meghalaya Games 2025 kaban long ha Jowai-Wahiajer, ka kynhun na ka Meghalaya State Olympic Association (MSOA) bad ki sports Association bapher bapher kila wan ban jied iaki jaka ialehkai ha Jowai bad Wahiajer haka 11 tarik Jylliew.

Ha kane ka jingwan jied iaki jaka ialehkai la ialam da u Working President MSOA u Bah John F Kharshiiing bad u General Secretary MSOA u Bah L Pariat, u Assistant Director ka tnad Sports bad District Sports Officer, Khroobok Passah bad ki nongialam jong ki synjuk bapher bapher lait noh ka ki nongialam na ka synjuk ialehkai jong ka Boxing.

Ban pynthikna iaki jaka ialehkai, ka MSOA bad ki synjuk kila leit kylleng ki jaka kynthup iaka Kiang Nangbah Government College kaba la jied na ka bynta ban pynlong iaka Swimming, Thomas Jones Synod College, Tpeppale, Jowai Presbyterian HSS, Ladthadlaboh, Wahiajer Sports Complex.

U Bah John haba kren ula ong ba ki don haduh 24 tylli ki synjuk kila wan ban jurip iaki jaka ialehkai bad kine ki kynthup iaka Archery, Athletics, Arm Wrestling, Badminton, Basketball, Cycling, Football, Golf, Gymnastic, Judo, Karate, Swimming Shooting, Softball, Sports Climbing & Mountaineering, Table Tennis, Tennis, Taekwando, Volleyball, Weightlifting, Wrestling, Wushu, Muay Thai bad Kho Kho

Ula iathuh ba ia mynta, na ka liang ka sorkar lyngba ka tnat Sports, ka la don hapdeng ka thong jong ka jingpynkhreh bad ban pynbit pynbiang ia ki jaka ban pynialehkai bad mynta ka sngi la pynthikna iaki madan bad ki jaka ialehkai bad ki jaka sah bad kiwei kiwei ki kam kiba iadei ban pynlong iaki jingialehkai. Ula ong ba ka Jowai ka bun iaki jaka ialehkai bad kane ka ai jingkyrmen bad kan pynim iaka district ban pynshlur iaki khynnah ban ialehkai bad ban sei iaki nongialehkai kiba kynsai kum ka jingpyrshang ka jong ngi bad ka ban long ruh kum ka jingpynkhreh iaka National Games 2026.

U Bah Finely, ula ong ba ka Jowai ka don bun ki hall bad ki jaka ialehkai bad kam don jingeh iaka sorkar ban pynlut ha ki jingtei bad ban pynbiang iaki tiar tar ialehkai.

Ula pynpaw ruh iaka jingsngewnguh ia baroh ki state association kiba shimkhia ban wan iadonlang ban jied iaki jaka ialehkai. Ula ong kaba sah ka long sa tang haka sorkar ba kan shim noh iaka sienjam ban sdang noh ban pynbiang iaki jingdonkam ban pynkhreh ia ka Meghalaya Games ka ban wan bad ban pynbna iaka tarik ialehkai.

Na kaliang u DSO, ma Khroobok ula ong ba iaka Swimming la jied iaka jaka ialehkai ha Kiang Nangbah Government College, bad ka Shooting long range la jied ha madan Tpeppale.

Ka jylla ka don sa katto katne bnai ban tei ïaki jingtei ka sorkar kan sdang shen ban pynbiang iaki jongdonkam ha ka ban tei ne shna ia baroh ki jaka ialehkai.