Wan jngoh ka Committee on Women Empowerment iaka West Jaintia Hills

Syllad | The Rising MeghalayaAugust 22, 2023

Ka Meghalaya Assembly Committee on Women Empowerment mynta ka sngi ba Ar ka la wan jngoh iaka thain West Jaintia Hills District, Jowai bad pynlong ruh ka jingialang bad ki tnat ba dei khmih ban iamir jingmut halor kiba bun ki mat kiba iadei bad ki kynthei khynnah hapoh ka district.

Ia kane ka jingialang ba la pynlong hapoh conference hall jong ka ophis Soil and Water Conservation ha Mihmyntdu, Jowai, la khlieh da ka MLA ka thain ka Kong Santa Mary Shylla ha ka jingsynran lang da kiwei pat ki dkhot jong ka committee kiba kynthup ia ka Miani D Shira, Bah Adelbert Nongrum bad u Mathew Beyondstar Kurbah.

Ha ka jingiamir jingmut la kham phaikhmat halor ki sienjam, ki skhim, ki lad jingiarap bad ki jingai jingshakri bala pyntreikam da ki tnat sorkar bapher bapher kiba thmu ban kyntiew bad aibor ia ki longkmie kynthei bad ki khynnah jong ka district.

Nalor kata ia ki prokram ba la pynlong da ki tnat sorkar bapher bapher la bishar bniah khnang ban lah ban pynthikna na ka bynta ki jingmyntoi bad ka bha ka miat jong ki kynthei khynnah hapoh ka district.

Kiwei pat kiba la ia don lang ha kane ka jingialang ki kynthup ia u Deputy Commissioner, West Jaintia Hills, u Bah BS Sohliya, IAS, u Superintendent of Police, WJH u Ma C Syrti, MPS bad kiwei kiwei.